Wednesday, October 28, 2015

උතුං ලඞ්කාංඩුවට ගෞරව බහුමානයෙන් යුක්තව දන්වා සිටින වගනම් - සහ අලි ප්‍ර‍‍හ‍ේලිකා අංක 3

"බිසී වීම මනුෂ්‍ය ගතියකි. ඇරියස් කවර් කිරීම දේව ගතියකි."
ආදර්ශ පාඨයකිං ලියවිල්ල ආරම්භ කිරීම ක්ලැසික් ගතියකි

මේ අපි කවුරුත් හොඳින් දන්න අඳුනන වල් මදාවියා හෙවත් විසිටරයා විසින් මා අරභයා දේශනා කරන ලද ආදුරුස පාටයකි.

මේ ආදුරුස පාටය දේශනා කරන්නට යෙදුන නිමිත්ත වූයේ මා පහුගිය දෙසතියේ අම්බානකට බිසී වීම නිසා බ්ලොග් ලෝකයේ වූ දේවල් (තියා නිවුස් මොනවක්වත් පවා) කිසිම දෙයක් නොදන්නා තත්ත්වයකට පත්වීමය.

ඩ්‍රැකියානිත් මාත් අවුරුදු තුනක් තිස්සේ බලාපොරොත්තුවෙන් සිටි අපේ කිරුළ හිමි ඩ්‍රැකී කුමාරයා මේ ලෝකයට බිහි වූයේ පහුගිය සතියේය.



ඉතිං මාර ආතල් ය. පාන්ද හතරට නැගිට, මෑණි පාර්ශවයත් එක්ක සෙටමෝල් වී උයාගෙන (ඒ කියන්නෙ අම්මට පොල් මිරිකා දී එයා උයා දෙන කෑම එක බැඳගෙන.) ඩ්‍රැකියානිට තේත් හදාගෙන හොස්පිටලය බලා පිටත් වන්නෙමි. ඊට පස්සෙ ගෙදර ආ වෙලේ ඉඳං, "හනේ දෝනිට මේ කෑමම දවල්ටත් දෙන්නෙ කෙ‍ාහොමදැ?" යි විස්සෝප වෙන අම්මා එක්ක තවත් මොකක් හරි වෑඤ්ජනයක් දෙකක් උයා, ඩ්‍රැකියානිගේ සහ පසුකාලීනව ඩ්‍රැකි පැටියාගේ කිලිටි රෙදි ගොන්න සෝදා දමා, අම්මාද කිහිල්ලේ ගසාගෙන දවල්ට ඩ්‍රැකියානි බලන්නට යන්නෙමි. ඒ කොල්ලා ගෙදර ඇවිත් පැය බාගෙයක් නිදාගෙන ඉන්නා මම ඊට පස්සෙ අවදි වෙන්නේ, ගේ දොර මිදුළ අතු පතු ගා, ඩ්‍රැකී පැටියා වෙනුවෙන් විශේෂ පිරිසිදු කිරීම් කොර, හවස විසිට් එක සඳහා අවශ්‍ය කළමනා ලෑස්ති කරන්ටය. හවස හොස්පිටලයෙන් ගෙදර ආ වෙලේ ඉඳන් පහුවදාට උයන්ට කළමනා ලෑස්ති කිරීම, කිළීටි රෙදි සේදීම, වේළුනු නැප්කින් අයන් කිරීම ආදී කප්පරක් කරුමාන්ත නිමවා මධ්‍යාහ්න දොළහට කිට්ටු කර (පැය එකහමාරක් විතර කිට්ටු කර) නිදාගන්නට යන්නෙමි.

මෙසේ කරන ලද දුෂ්කර කිරියාව දැන් ඩ්‍රැකී පැටියා සමඟ නයිට් ඩියුටි කිරීම දක්වා වෙනස් වී ඇත්තේය. මොකද ඩ්‍රැකියානි කියනාකාරයට ‍මූ නම් ගිය ආත්මයේ මුරකාරයෙකි. මුන්දෑ දවාලට බබා වගේ නිදාගෙන ඉඳ, රෑ තිස්සේ ගෙදර දෙවනත් කිරීමේ කාර්යයේ නිරත වෙන නිසාය.

කෙසේ වෙතත් කුළුඳුලේ පුතෙක් ලැබීම රටක් රාජ්ජයක් ලැබුණා වගේය. වැඩියත්ම වැදගත් වන්නේ අපි බලාපොරොත්තු වුනේ එක දරුවෙක් විතරක් හදන්ට නිසාය. (සිංහල ජාතිය ගැන හිතා දරුවන් පඩිපෙළක් හදන්නට කියන උන්ට මට කියන්නට ඇත්තේ, ඊට පෙර වනචර දොස්තරයන් ගේ මානසික රෝග සුවකර, නර්ස් ලා සහ මිඩ්වයිෆ්ලා ට මිනිස්සුන්ට කතා කරන්නට උගන්වන ලෙසය... අම්මප...!!!)

අවසානයේ, මෙතෙක් කලක් ඩ්‍රැකී ජූනියර් ලෙසින් හඳුන්වාගන්නා ලද මා, ගිය සතියේ සිට ඩ්‍රැකී සීනියර් ලෙස මාගේ ඊ්මේලය, සහ මූණු පොතේ එකවුන්ටය වෙනස් කරනා බවට උතුං වූ බ්ලොග් අවකාශයටත්, එහි සැරිසරනා සියල්ලන්ටමත් ‍ගෞරව බහුමානයෙන් යුක්තව දන්වා සිටින වගයි...

-------------------------

උඩිං කියන්නට යෙදුන කාරණේත් එක්ක, ඩ්‍රැක්‍යුලාගේ ඉතිහාසය ලියාගන්නට මේ සතිය වන විටත් බැරි වීම නිසා, කලිං පෝස්ටුවේ පහතින් ලියා පොරොන්දු වූ විදිහට, අලි ප්‍රහේලිකා අංක තුන, ඉදිරිපත් කරනු ලැබේ...

(චර චර චර චර... හුරේ...! ජය වේවා...!!!)

1. 
ගිරව් තුන් දෙනෙක් එකා පස්සෙ එකා සරළ රේඛාවක් විදිහට පියාඹාගෙන යනවා. ඉස්සෙල්ලම ගිය ගිරවා පිටිපස්ස හැරිලා බලලා කියනවා, "මගෙ පස්සෙං තව ගිරව් දෙන්නෙක් එනවා" කියලා. දෙවෙනි ගිරවත් පස්ස හැරිලා බලලා කියනවා,  "මගෙ පස්සෙං තව ගිරව් දෙන්නෙක් එනවා" කියලා. අන්තිම ගිරවත් පස්ස හැරිලා බලලා කියනවා,  "මගෙ පස්සෙං තව ගිරව් දෙන්නෙක් එනවා" කියලා. කොහොමද එහෙම උනේ?

2. 
මත්තල හිටපු කොකෙක් හිටියා. උගේ කෙකි කෑල්ල වැඩකළේ කොළඹ බෝඩ් වෙලා. ඉතිං හැම සෙනසුරාදම කොක‍ා උදේ හයට මත්තලිං පිටත් වෙලා පියාඹගෙන එනවා කොළඹට. ඌ කොළඹට එද්දි උදේ 8 යි. ඊට පස්සෙ කොක් ජෝඩුව වික්ටෝරියා පාක් ගිහිං, ගෝල් පේස් ගිහිං, තව තව තැං ඔල ගිහිං එහෙම, දෙන්නා සමුගන්නෙ දවල් දොළහට. දවල් දොළහට කොළඹින් පිටත් වෙන කොක‍ා, මත්තලට ළඟ වෙද්දි හවස හතරයි.
කෙටියෙං කිව්වොත්, උදේ කොක‍ාට කොළඹ එන්න පැය දෙකක් ගියාට, හවස යද්දි පැය හතරක් ගතවෙනවා. ඇයි ඒ?

3. මේ කොකාම වැහි දවසක පියාඹාගෙන යනවා. අකුණක් ගහනකොට ඌ එකපාරටම පහළට වැටෙනවා. ආපහු උඩට ඉගිළෙනවා. ආයෙ අකුණක් ගහනකොට ආයෙම පහළට වැටෙනවා. ඇයි ඒ?

4.
මෙන්ඩයි, සඳුවයි, පොඩි මෙන්ඩයි පනු තාත්තයි, පනු අම්මයි, පනු පුතයි පාරට බැස්සා. පනු පුතාව මොන්ටිසෝරියට බාර දෙන්න යන්න. පාරෙ අයිනෙන් එද්දි තඩි කන්ටේනරයක් වේගෙන් ඇවිත් ඒ අය පාස් කර‍ගනෙ ගියා. බයවෙච්ච පාර පනු පුතා කිව්වා, "තව ඩිංගෙං අපි හතර දෙනාම ඉවරයි" කියලා. කොහොමද හතර දෙනෙක් උනේ?

5.
පනු අම්මයි, පනු තාත්තයි, පනු පුතයි, පනු පුතා ශිෂ්‍යත්වෙන් පාස් වෙච්ච සතුටට ඩිනර් එකකට එළියට ගියා. හෝටලේට ඇතුල් වෙච්ච ගමං පනු පුතා කිව්වා, "අර ටේබල් එකේ නම් අපි හතර දෙනාටම ඉඩ තියෙනවා" කියලා. කොහොමද හතරක් උනේ? (උඩ ප්‍රශ්නෙට උත්තරේ මේ ප්‍රශ්නෙට භාරනොගන්නා බැවින් කරුණාවෙන් අලකන්න.)

6.
පොළොව මැද්දෙ ගල් කන පණුවෙක් ඉන්නවා. උගෙ නම මොකද්ද?

7.
මුහුද මැද්දෙ යකඩ බල්ලෙක් ඉන්නවා. ඌ කන්නෙ මොනවද?

8.
පොරක් විදේශ ගත වෙන්න හිතලා, හදිසියෙන් තමන්ගෙ දේපළ ඔක්කොම විකුණලා ගත්තා ප්‍රයිවට් ජෙට් එකක්. පොරට විකුණගන්න බැරි උනේ වොෂිං මැෂීන් එක විතරයි. ජෙට් එකට පටවන්න පුළුවන් කිලෝ සීයයි. පොර බරයි කිලෝ හැත්තෑවක්. වොෂිං මැෂින් එකත් කිලෝ හැත්තෑවක් බරයි. කොහොමද පොර වොෂිං මැෂින් එකත් අරගෙන පිටරට ගියේ?

9.
හරකෙක් තාප්පයක් අයිනෙ ගැටගහලා ඉන්නවා. ඌ විඩිං විඩේ තාප්පෙට උඩිං බලනවා. උෟ ඇයි තාප්පෙට උඩිං බලන්නෙ?

10.
ඇමරිකාවෙන් වළක් හාරගෙන හාරගෙන ගිහිං, පොළොවෙ අනිත් පැත්තෙං මතු උනා. ඒ වැඩේ හරියට වුනාද කියලා බලන්න, ඇමරිකාව පැත්තෙං ගල් කීපයක් දැම්මා වළට. ඒත් ඒවා අනිත් පැත්තෙං එළියට ආවෙ නෑ. ඇයි ඒ?

11.
කෙල්ලෙකුයි කොල්ලෙකුයි මුහුදු වෙරළට ගියා. කෙල්ල කිව්වා කොල්ලට "මට මුතු ගොඩක් ගෙනත් දෙන්න" කියලා. කොල්ලා ජබුක් ගාලා පැන්නා වතුරට. පැනල බැලින්නං පැනපු තැන මුතු බෙල්ලො විමානයයි. පොර ඔළුව වතුරෙ ඔබාගෙන බෙල්ලො අහුරු අහුරු අරං වෙරළට විසි කරන්න ගත්තා. මහ වෙලාවකට පස්සෙ කොල්ලා ආපහු ගොඩට ඇවිත් බලනකොට, කෙල්ල සුන්බුන් ගොඩක් මැද මැරිලා හිටියා. කොහොමද කෙල්ල මැරුණෙ?

12.
තාත්තල දෙන්නෙකුයි පුත්තු දෙන්නෙකුයි සිරීපාදෙ ගියා. ආපහු ආවෙ තුන් දෙනයි. ඒ ගැන ගෙදර කවුරුවත් කළබල උනෙත් නෑ. ඇයි ඒ?

මේ ප්‍රශ්න වලට උත්තර දෙන්න පුළුවන් වුන කාට උනත්, තෑග්ග විදිහට මම කණට කරලා කර්ණ රසායන සිංදුවක් කියනවා...

ප/ලි
මේ ප්‍රශ්න ඔක්කොටම උත්තර දෙන්න පුළුවන් උනොත් රවි ට හෝ ඩූඩ්ට, උන් දෙන්නාගේ ඉල්ලීම පරිදි මේ බ්ලොග් එක උන් දෙන්නාටම පවරා දෙන්නට අදහස් කරමි.

Tuesday, October 13, 2015

අලි කූඹි කතා - පිළීතුරු සහ ජයග්‍රාහකයෝ...

http://1.bp.blogspot.com/-MNZ57sVr-SM/U8-xw41y5ZI/
AAAAAAAABdQ/SBMtYXBynNg/s1600/
Marriage+Problems.jpeg

පසුගියදා මම ඉදිරිපත් කළ අලි කූඹි කතා නවයට පිළිතුරු සපයන්න සහ අදහස් දක්වන්න ඉදිරිපත් වුනු හැමෝටමත්, තවත් අලි කූඹි කතා දෙකක් එකතු කරපු මනෝ මන්දිර සහෝදරයටත් ගොඩක් ඉස්තූතියි.

මෙන්න එහ‍ෙනම් හරි පිළීතුරු සහ ජයග්‍රාහක බවතුන් ගේ ලේඛනය -

1. ප්‍රශ්නය.
අර අලියට හෙම්බිරිස්සාව නිසා කුරුම්බා බිව්වෙ නෑ.

අපේ දොස්තර මාම නං කියන්නෙ, ඒක හරි මැටි අදහසක් බවයි. කුරුම්බා තැඹිලි වගේ දේවල තියෙන්නෙ සේලයින් දියරයෙම සංයුතිය ඇති දියරයක්. එතකොට සෙම, උණ ආදී ලෙඩ හැදිලා අමාරු වෙලා ඉස්පිරිතාලෙ නෙියන ලෙඩ්ඩුන්ට සේලයින් දෙන්නත් එපා කියනවද කියලා උන්නැහැ අහනවා.

නිවැරදි පිළිතුරු දුන්න අය - 
බස්සි, මනෝ මන්දිර, යක්‍ෂ්‍යන්ත ශ්‍රීනාත් හෙවත් කැමා, ඉවෝන් ලව්පූසා, බණ්ඩා, ගබා, නිදහසේ නවාතැන

2. ප්‍රශ්නය.
අනික් අලියට සීසන් එකක් තිබුණා.

නිවැරදි පිළිතුරු දුන්න අය - 
බස්සි, මනෝ මන්දිර, කැමා, ලව්පූසා, බණ්ඩා, ගබා, කුරුට්ටා

3. ප්‍රශ්නය.
අනික් අලියා වෙන ආගමක (මුස්ලිම් හරි කතෝලික හරි නිඝණ්ඨ හරි ඔය මොකක් හරි...)

නිවැරදි පිළිතුරු දුන්න‍ෙ 
නිදහසේ නවාතැන විතරයි

4. ප්‍රශ්නය.
කූඹියා පිළීමගෙට ඇතුල් වෙද්දි ගළවලා ගියපු සෙරෙප්පු දෙක දොරටුවෙ තිබුණා. අලියා දැනගත්තෙ ඒකෙන්.

නිවැරදි පිළිතුරු දුන්න අය - 
බස්සි, මනෝ මන්දිර, කැමා, ලව්පූසා, බණ්ඩා, ගබා, නිදහසේ ගල්ආඳි

5. ප්‍රශ්නය.
කූඹියා ගොඩ හිටියෙ අලිය නෑවට පස්සෙ උගෙ ෂෝට ඉල්ලගන්න.

නිවැරදි පිළිතුරු දුන්න අය - 
බස්සි (දෙවන උත්සාහය), මනෝ මන්දිර, කැමා, ඉවෝන් ලව්පූසා, ඇංගුලිෆෝමසියා

6. ප්‍රශ්නය.
අලියට ලයිසන් තිබුණෙ නෑ. කූඹියට විතරයි තිබුණෙ.

නිවැරදි පිළිතුරු දුන්න අය - 
බස්සි (දෙවන උත්සාහය), මනෝ මන්දිර, කැමා, ඉවෝන් ලව්පූසා, බණ්ඩා, ගබා, නිදහසේ නවාතැන, මලියා

7. ප්‍රශ්නය.
කූඹියා හෙල්මට් එකක් දාගෙන හිටියා. අලියා හෙල්මට් එක අතේ දාගෙන හිටියෙ, පොලිසියෙං හිටියොත් ඔළුවෙ දාගන්න හිතාගෙන...

නිවැරදි පිළිතුරු දුන්න අය - 
බස්සි, මනෝ මන්දිර, කැමා, ඉවෝන් ලව්පූසා, බණ්ඩා, ගබා, නිදහසේ නවාතැන

8. ප්‍රශ්නය.
කූඹියා අලියට ලේ දීලා.

නිවැරදි පිළිතුරු දුන්න අය - 
බස්සි, මනෝ මන්දිර, කැමා, ඉවෝන් ලව්පූසා, බණ්ඩා, ගබා, නිදහසේ නවාතැන

9. ප්‍රශ්නය.
අලියගෙ කූඹි භාර්යාව අලිපැටියෙක් වඩාගෙන ඇවිත් හිටියා.

නිවැරදි පිළිතුරු දුන්න අය - 
මනෝ මන්දිර, කැමා, ඉවෝන් ලව්පූසා

අපේ ආදර බර තරඟකාරයන් ඒ අනුව ලකුණු ලබාගන්නේ මෙහෙමයි -

බස්සි - 07/09
මනෝ මන්දිර - 08/09
කැමා - 08/09
ඉවෝන් ලව්පූසා - 08/09
බණ්ඩා - 06/09
ගබා - 06/09
නිදහසේ නවාතැන - 07/09
කුරුට්ටා - 01/09
මලියා - 01/09
ප්‍රසන්න - 100/09

ඒ අනුව තරඟකාරයන් සියලු දෙනාට (මං කියල තිබ්බෙ නිවැරදි උත්තර දෙන දහදෙනාට කියල නේ...) කොටදෙණියාවේ පොලිසියේ නිරීක්ෂණ චාරිකාවක් සහ දින තුනක නිවාඩුවක් ද, කොටදෙණියාවේ ඕඅයිසී අනුග්‍රහයෙන් නිරෝගී දිවියකතට ආයුර්වේදීය සම්බාහනයක්ද හිමිවනවා ඇත. කරුණාකර වැල පිරවූ ලැප්ටොප් එකක් මේසය මත තබාගෙන සූදානමින් ඉන්න, ඔබට නිවසේසිටම ප්‍රවාහන පහසුකම් පොලිස් ප්‍රවාහන කොට්ඨාෂයෙන් ලැබෙනවා ඇති. අපෙන් සුභපැතුම්!!!

වැරදි උත්තර දුන්න සහ ලිස්සා ගිය උදවිය මේ අයයි -

කම්මල කම්මල,
මහේෂ් රත්නායක,
නලීන් දිල්රුක්ෂ,
අටං,
මෙන්ඩා,
අපනයනකරු,
හැලපේනියා ඔතේනියා, 
අහස් කූරා,
ලොකු පුතණ්ඩියා,
අවංක ආරියරත්න,
විචාරක හැළිවළංගොඩ,
ට්‍රාන්ස් සිල්වෙස්ටර්,
පොඩි (ඒ කාලෙ වෙන්නැති) කුමාරිහාමි,
රවිරාජ,
ඩූඩ් බෝට්ටු පුහුණුකරු,
මනෝජ් ප්‍රනාන්දු,
අඟහරුවාදා,
මළදානෙ මහතා, 
(හම්මේ... යකෝ මේ ලිස්ට් එකේ දිග...)

මේ දිග ලිස්ට් එකේ ඉන්න උදවිට සැනසිලි තෑගි ලෙසට, ගිය සිංහල අවුරුද්දට සුරංගගේ ආච්චම්මා විසින් සාදන ලද හැඳි කැවුම් එක බැගින් ඉදිරිකාලයේදී ලැබෙනු ඇත.

ප/ලි
ඩ්‍රැක්‍යුලාගේ කතාවේ අන්තිම කොටස මේ සතියෙවත් ලියාගන්න බැරි උනොත් හෙම, මේ ප්‍රෙහෙලිකාවේ තවත් කොටසක් ලෙස, ගිරා පනු සහ තවත් සත්තු කතා බලාපොරොත්තු වන්න...





Monday, October 5, 2015

අලි ප්‍රහේලිකා අංක 2 - අලි කූඹි කතා...


මෙන්න ඔබ පුල පුලා - තල තලා බලා සිටි, අලි ප්‍රහේලිකා අංක දෙක අරන් අදත් ඔබේ නිවහනට ගොඩවදින්නේ ඔබේ සුමිතුරු ඩ්‍රැකියා. සමහර උදවිය දැනටමත් හොඳින් දන්නා පෞරාණික කතන්දර කීපයක් අරගෙනයි මේ ආවේ. ඔන්න එහෙනං පුරස්න...

01.
අලි දෙන්නෙක් කැලයක් මැදින් ගමනක් ගියා. ඉන් එක අලියෙක් කුරුම්බ ගහකට නැගලා, කුරුම්බා ගෙඩි හතඅටක් කඩලා, කීපයක් බීලා, අනිකටත් බොන්න කිව්වා. ඒත් අනික් අලියා බිව්වෙ නෑ. ඇයි ඒ?

02.
අලි දෙන්නා කැළෙන් එළියට ඇවිත්, පාරටම ඇවිල්ලා බස් එකකට නැග්ගා. එක අලියෙක් ටිකට් එකක් ගත්තා. අනිකා ටිකට් එකක් ගත්තෙ නෑ. ඇයි ඒ?

03.
අලි දෙන්නා බස් එකෙන් බැහැලා පන්සලකට ගියා. එක අලියෙක්ගෙ ගජ මිතුරා වුන, කූඹියා හිටියෙ ඒ පන්ස‍ලේ. පන්සලේ හාමුදුරුවො දැකපු එක අලියෙක් ඒ හාමුදුරුවන්ට දණ ගහලා වැන්දා. අනික් අලියා වැන්දෙ නෑ. ඇයි ඒ?

04.
අලි දෙන්නා කූඹියත් එක්ක හැංගිමුත්තං සෙල්ලං කරන්න පටන් ගත්තා. අලි දෙන්නා මුලිම්ම හැංගුනා. කූඹියා ලේසියෙන්ම උන් දෙන්නව හොයාගත්තා. හැබැයි කූඹියා හැංගුනහම අලින්ට ඌව හොයාගන්න ගොඩක් අමාරු උනා. අන්තිමේ එක අලියෙක් පිළීම ගේ ළඟට ඇවිත් දැනගත්තා කූඹියා ඒක ඇතුලෙ ඉන්නෙ කියලා. අලියා කොහොමද ඒක දැනගත්තෙ?

05.
දවසක් කූඹියයි අලියයි නාන්න වැවට ගියා. දෙන්නම නාන්නයි ගියේ. ඒත් අලියා වැවට බැහැලා නාද්දි කූඹියා ගහකට හේත්තු වෙලා ඉන්නවා. ඇයි ඒ?

06.
කූඹියා අලියත් එක්ක මෝට බයික් එකකිං ගමනක් ගියා. කූඹියා තමයි බයික් එක පදින්නෙ, අලිය පිටිපස්සෙ සීට් එකේ. ඇයි කූඹියා අලියට පදින්න දුන් නැත්තෙ?

07.
ඔහෙම බයික් එකේ පල්ලමක් එක්ක වංගුවක් ගන්න ගිහිං බයික් එක පෙරළුනා. සෑහෙන්න ඩැමේජ්. අලියට හොඳටම තුවාලයි. කූඹියා හීරිලාවත් නෑ. ඇයි ඒ?

08.
අර ඇක්සිඩන්ට් එකෙන් පස්සෙ අලියට සිහිය ආවෙ ඉස්පිරිතාලෙ ඇඳක් උඩ. ඌ බලනකොට කූඹියත් අනික් ඇ‍‍ඳේ ඉන්නවා වැතිරිලා. ඇයි ඒ?

09. අලියා බැන්දා කූඹියගෙ නංගිව. බැඳලා මාස තුනයි, සංගීතයක් බලන්න ගිහිං වලියක් දාගෙන අලියා දහඅටමාසෙකට හිරේ ගියා. ඌ හිරෙන් නිදහස් වෙලා එද්දි, හිරගෙදර ඉස්සරහට කූඹි ගුලේ හැම කූඹියෙක්ම ඇවිත් තිබුණා ඌව පිළිගන්න. ඒ කූඹි රෑන අතරින්, අලියා ඈත තියාම තමන් බැඳපු කූඹිච්චිව අඳුනගත්තා. කොහොමද ඒ?
http://www.teluguone.com/tonecmsuserfiles
/Elephant%20Ant%20Joke(1).jpg

වඩැත්ම නිවැරදි උත්තර දෙන දහදෙනාට කොටදෙණියාව පොලිසියට නිරීක්ෂණ චාරිකාවක් සහ කොටදෙනියාව පොලිස් ක්වාටස් වල ඇති සම්බාහන ආයතනයේ දින තුනක පොලිස් සත්කාර සහිත නිවාඩුවක් ලබා දෙනු ලැබේ.


වැඩිපුර බලපු ලිපි