අලි මාලය - ගජබින්නාලංකාරයේ තෙවන කතා වස්තුව

කොයි ගමක වුනත් ඉන්නවානේ බොරු පැළ කරන්න පුළුවන් උදවිය. ඒ අයගෙන් ගමේ ගොඩේ ඕනෙම අවස්ථාවකදි (ඒ කියන්නෙ, මළ ගෙදරක, ශ්‍රමදානෙක වගේ) මහන්සිය, පාළුව මැකුණ එක සමාජමය වශයෙන් ඉටු වුණ මාර සේවයක්. මම පොඩි කාලෙ අහපු කතා, යාළුවන්ගෙන් අහගත්ත කතා එහෙම ඇතුළත් කරලා ගොනු කරන  ගජබින්නාලංකාරයෙන් මම බලාපොරොත්තු වෙනවා ඒ ජන සාහිත්‍යය එක් තැන් කරන්න. ගජබින්නාලංකාරයේ පළවෙනි කතාවත්, දෙවැනි කතාවත් මේ ලින්ක් වලින් බලාගන්න පුළුවන් වෙයි. තුන්වෙනි කතා වස්තුව විදිහට අද කියන්න යන්නෙ බොහොම චුට්ටං කතාවක්.

අපේ සීයගෙ තාත්තා වුණ සුවාතා කොලු ගැටය කාලේ ගම්පහ සුදු ඒජන්ත මහත්තය අපේ ගම්මුලාදෑනියට පණිවිඩයක් එව්වලු අලියෙක් අල්ලල දෙන්න කියලා. ගම්මුලාදෑණියත් ඉතින් ගමේම හිටපු සූරයා වුණු සුවාතට ඒ වැඩේ බාර දුන්නලු. සුවාතා කළේ අවශ්‍ය කළමනා ටික එකතු කරන් ගමේ ඉස්මත්තෙ තිබ්බ කැළේට ගිය එකයි. තනියම තමයි එයා ගියෙ. මොකෝ අපේ පරම්පරාවෙ කවුරුවත් දන්නෙ නෑ ඔය සාමාන්‍ය උදවිය හැම තිස්සෙම කියන ‘බය‘ කියන වචනෙ තේරුම. (මාත් තවම හොයනවා.)

අලි අල්ලන්න ඕනෙ කරන කළමනා තමයි:

1. හකුරු හොන්ඩරයක්,
2. හයිය තියෙන කඹ හතක්,
3. හකුරු දිය කරගන්න ලොකු භාජනයක්.

ඉතින් සුවාතා, කඹ හතම ගහක ගැටගහලා එකට අඹරගත්තලු එක කඹයක් වෙන්න. ඊට පස්සෙ ඒක ලිහලා අරං, හකුරු ටික ඔක්කොම දියකරලා, කඹේ සම්පූර්ණෙන්ම ඒ හකුරු දියරෙ පෙඟෙව්වලු. ඊට පස්සෙ හොඳ හයිය තියෙන ගහක (මිරිස් ගහක නෙවේ) කඹේ එක කොණක් ගැටගහලා, ගෙදර ගියාලු.

අලි හරිම ආසයි පැණිරසට. ඉතින් සුවාතගේ බලාපොරොත්තුව උනේ අලියෙක් ඇවිත් අර කඹේ ගිළගෙන ගිළගෙන ගිහින් ගහ මුලින් නතර වෙයි කියලා. ඒත් පහුවදා උදේ යන්න බැරි වෙලා ළග ගෙදරක මළ ගෙයක් වෙලා. ඉතින් දවස් හතේම රෑ නයිට් ගහලා, හත්දවසෙ දානෙන් පස්සෙ .ගිහින් බලනකොට, ගහ මුල අලි පෝළිමක් ලු එකා පස්සෙ එකා.

වෙලා තියෙන්නෙ, එක අලියෙක් ගිළපු ලණුව උගේ බෙටිත් එක්ක හරි මාර්ගයෙන් එළියට ආවට පස්සෙ තව එකෙක් ගිළලා. ඊට පස්සෙ තව එකෙක්, ඊට පස්සෙ තව එකෙක් වශයෙන් ඒ විදිහට අලි දහ දෙනෙක් ලණුවට අමුණලා, සුවාතයි ගම්මුලාදෑණියයි සුදු ඒජන්ත මහත්තෙයට තෑගි කළාලු අලි මාළයක්.

ගජබින්නාලංකාරයේ මී ළඟ කතාවෙන් හමුවෙන තුරු ආයුබෝවන්.

මේවගේ ගල්පැලෙන පට්ටපල් ඇත්ත කතා තියෙනවනම් එවන්න මගෙ ඊ ලිපිනය ට : drackey@gmail.com නැත්නම් කමෙන්ට් එකක් විදිහට දාන්න.

පින්තූර ඉස්සුවෙ :
http://creatureartteacher.com/static/513a1e95e4b0d066f2382c86/513a4d1fe4b0b7c3a752d056/513a4d22e4b0b7c3a752d15a/1362775330470/1000w
http://iamanartstudentwhatamidoing.blogspot.com/2009/03/elephant-tattoo.html

ප/ලි මිසිස් ඩ්‍රැකී අහනවා ඇයි අනේ ඔයා කම්කරු දිනේ ගැන මොනවත් ලියන් නැතුව ලණු ගිලින එක ගැන ලියන්නේ කියලා. මට ඒකට දෙන්න උත්තරයක් නම් තාම හිතට ආවෙ නෑ.