 |
| ඉෆිජියානා බිළීදීම - ලෙයොනාර්ට් බ්රැමර් ගේ චිත්රයක් උපුටාගැනීම - (https://commons.wikimedia.org/wiki/ File:Bramer,_Leonaert_-_The_Sacrifice_of_Iphigenia_-_c._1623.jpg) |
ට්රෝයි යුද්ධයට යන ක්රීටයේ අගමෙන්නෝන් රජු, එහි සාර්ථකත්වය වෙනුවෙන් පූජකයන්ගේ ඉගැන්වීම් අනුව තමන්ගෙ දුව බිලි දුන්නා. ඒක සමූහයක් වෙනුවෙන් තමන්ගේ පෞද්ගලිික බැඳීම කැප කිරීමක් වගේම, පවුලට සහ පුද්ගලයෙකුට එරෙහිව කරපු අපරාධයක්.
අපරාධයට එරෙහිව යුක්තිය ක්රියාත්මක වුණේ, යුද්ධය දිනා ආපිට තම ගෙදරට ආ අගමෙම්නෝන් රජු, ඔහුගේ භාර්යාව මෙන්ම අර බිළිදෙනලද දැරියගේ මව, සිය පෙම්වතා සමග එක්වී මරා දැමීමෙන්.
 |
| https://cdn.britannica.com/15/12115-004-DE1A8ABB/Electra-Orestes-Clytemnestra-presence-detail-Aegisthus-vase.jpg |
ඒ අපරාධයට යුක්තිය ඉටු වුණේ අගමෙම්නෝන් රජු ගේ ඖරස පුත්රයා වූ ඔරේෂස් තමන්ගේ පියා මැරූ තැනැත්තා මරා දැමීමෙන්.
ශිෂ්ඨාචාරයේ මුල් කාලයේ යුක්තිය ඉටු වුණේ පළිගැනීමේ ස්වරූපයෙන්. ඒක සමාජ සාරධර්මයක් ලෙස පිළිගැණුනා.
හමුරාබි රජු "ඇසට ඇස, දත ට දත" නීතිය ලේඛන ගත කරන්නෙ ඒ වගේ සමාජයක. පසුකාලීනව තව තවත් මානව සමාජය ශිෂ්ඨ සම්පන්න වෙද්දී, මධ්යස්ථ පුද්ගලයෙක් විසින් දෙපැත්තේම කරුණු විමසා ස්වාධීන තීරණයක් දීම වඩා යහපත් සහ සාධාරණ බව පිළිගැණුනා.
තව්රාත්, බෛබලයේ පරණ ගිවිසුම සහ ෂාරියා හි අඩංගු වූ තද නීතිය, සමාජය විසින් තහවුරු කරගත්තේ සමාජය හික්මවීම මඟින් සමාජ විරෝධී ක්රියා තුරන් කිරීමට. "...දරුවෙක් අකීකරු වුණොත්, ඔහු නගරය මැදට ගෙනැවිත්, ඔහු අකීකරු බව ප්රසිද්ධියේ කියා, ගල් ගසා මැරිය යුතුයි..." ඒ ප්රකාශය තියෙන්නෙ බෛබලයේ පැරණි ගිවිසුමේ.
කාමයේ වරදවා හැසිරෙද්දීම අල්ලාගත් ගණිකාවක් ජේසුතුමා වෙත අරගෙන ආවා. ඒ අරගෙන ආවේ ආගමික ඉගැන්වීම් අකුරටම පිළිපැද්ද අය සහ විනයධරයන් ලෙස ප්රසිද්ධ අය.
"මේ ගණිකාවක්. පවු කරද්දිම අල්ලාගත්තා. මෝසෙස් උගන්වා තියෙන්නේ ගල් ගසා මරා දැමිය යුතුයි කියා. ඔබ මේ ගැන කියන්නේ මොකද්ද?" ඔවුන් ඇසුවා. එසේ ඇසුවේ ජේසු තුමාගෙන් කොණක් අල්ලා ගෙන ඔහු වැරදි දේ උගන්වන බව පෙන්වා දෙන්නයි.
ජේසු තුමා ඇඟිල්ලෙන් බිම ලියන්නට පටන් ගත්තා. ඒත් අර උදවියගේ කෑ ගැසීම් නැවතුණේ නෑ.
"ඔබ අතරින් පවු කර නැති තැනැත්තා ඇයට පළමු ගල ගසන්න" ජේසු තුමා කීවේ ඔවුන්ගේ ඉල්ලීම කෙළවරක් නැති තැනට ආ පසුයි. එසේ කියා එතුමා ආපහු බිම ලියන්න ගත්තා.
වැඩිහිටියන්ගෙන් පටන් ගෙන අර රැස්ව සිටි අය එකා දෙන්නා යන්න ගියා. අන්තිමේ එතැන ඉතිරි වුණේ අර ස්ත්රිය විතරයි.
අවසානයේ ජේසු තුමා ඔලුව උස්සා බැලුවා.
"ඒ අය කෝ? කවුරුවත් ඔබට වැරදි තැබුවේ නැද්ද?"
"නෑ. කවුරුවත් මට වැරදි තැබුවේ නෑ." ස්ත්රිය කිව්වා.
"එහෙනම් මමත් ඔබට වැරදි තියන්නේ නෑ. යන්න. ගිහින් පවු නොකර ඉන්න" ජේසු තුමා කිව්වා.
(ශු. ජුවාම් 8: 1-11)
 |
| https://joequatronejr.files.wordpress.com/2011/07/mary-magdalene-stoned-jesus.jpg |
නැතිවූ බැටළුවාගේ උපමාව, අකීකරු පුත්රයාගේ උපමාව ආදී ඉගැන්වීම්වලදී එතුමා පැහැදිළි කරන්නේ, ආගමික ජීවිත ගත කරන්නන් සියයකට වඩා, තමන්ගේ වරද අවංකව තේරුම්ගෙන පසුතැවිලි වන එක පවුකාරයෙක් නිසා දෙවියන් වහන්සේ සතුටු වන බව.
ඒක වෙනත් පැත්තකින් දැක්කොත්, අපරාධකාරයෙක් තමන් වැරදි මග යන බව තේරුම් ගත්තොත්, ඒ ගැන අවංකව පසුතැවුනොත්, ඔහුට සමාජයට යහපත් මිනිහෙක් බවට පත්වෙන්න අවස්ථාව දීම හරිම වැදගත්. ඒ වගේම ඒ ගැන සමාජය සතුටු විය යුතුයි.
හොඳ මිනිසුන් වගේම, වැරදි කරමින් සිට ඒ වැරදි අවබෝධ කරගෙන ඒවා නිවැරදි කරගන්න උවමනාව දක්වන උදවියත්, ආදරය කරනු ලැබීමට සුදුසුුයි.
ඒ එක්ක බලනකොට, යුක්තිය කියන්නෙත් අශිෂ්ඨ සමාජයකට අවශ්ය වූ පළිගැනීමේ සංකල්පයක් මිසක්, වඩා මානුෂික සමාජයක තිබිය යුතු දෙයක් නොවේ.
අපරාධයක් වෙනුවෙන් යුක්තිය ඉටු කරන තැනැත්තා, අර අපරාධකාරයාගෙන් වෙනස් වන්නේ ඔහු පිටුපසින් සිට ඔහුට ශක්තිය දෙන සමාජ සම්මතය නම් ආධාරකයෙන් විතරයි. අපරාධයකින් යම් කිසි මිනිසෙකුට හෝ කණ්ඩායමකට හාණියක් පැමිණෙනවා. ඒක වෙනුවෙන් ඉටු කරන යුක්තියෙන් සිදු වෙන්නේ අපරාධකරුට හාණියක් සිදු කරන එකයි. ක්රියාව ගැන විතරක් හිතුවොත්, අපරාධකරුත්, යුක්තිය ඉටු කරන්නාත් යන දෙන්නාම කරන්නේ එකම ක්රියාව. අපරාධකරු හදිසි කෝපය හෝ ද්වේෂය හෝ අපරාධ සිතුවිල්ල නිසා කරන ක්රියාවම, යුක්තිය ඉටු කරන්නා, යුක්තිය නම් සංකල්පය නිසා කරනවා.
ජේසුතුමා රෝම ශිෂ්ඨාචාරයේ යකඩ සපත්තුවට පෑගුණු දිළිඳු මසුන් මරන්නන් හෝ සංචාරක එඬේරුන් අතරින් මතුවෙලා අපට උගන්වන දේ වර්තමාන සමාජයේ සාරධර්මවලටත් වඩා මට්ටම් ගණනාවකින් උසස්...
එතුමා කියන්නේ අපරාධකාරයාට දඬුවම් කිරීම කියන්නේ අපේම සහෝදර මනුෂ්යයෙකුට එරෙහිව සංවිධානාත්මක සමාජයක් විසින් තවත් අපරාධයක් කිරීමක්. කළ යුත්තේ එය නොව, අපරාධකාරයාට ඔහුගේ වරද තේරුම් ගෙන ඒ ගැන පසුතැවීමට සහ නිවැරදි මගට පිවිසීමට උපකාර කිරීම සහ ඉඩ හැරීමයි. එසේ හරි මඟට හැරෙන තැනැත්තා ආදරයෙන් පිළිගැනීමයි...
ලෙයට ලෙය ඉල්ලා සිටීම තිරිසන් කමක්.
එකල පේදුරු උන් වහන්සේ වෙතට අවුත්, ”ස්වාමීනි, මට විරුද්ධ ව පව් කරන මාගේ සහෝදරයාට මා කී වාරයක් කමා විය යුතු ද? සත් වාරයක් දක්වා දැ”යි උන් වහන්සේගෙන් ඇසී ය. ජේසුස් වහන්සේ ඔහුට කතා කොට, ”සත් වාරයක් නොව, සත් වාර සැත්තෑවකි.
”මන්ද, ස්වර්ග රාජ්යය මෙවැන්නකට උපමා කළ හැකි ය: සිය දාසයන් සමඟ ගණන් හිලව් බැලීමට තීරණය කරගත් රජෙක් විය. ඔහු එසේ කරන්න පටන්ගත් කල රුපියල් දෙකෝටියක් පමණ ණය වූ කෙනෙක් ඔහු වෙත ගෙනෙන ලද්දේ ය. ණය ගෙවීමට ඔහුට කිසිවක් නොතිබුණු බැවින්, ස්වාමියා ඔහු ද ඔහුගේ බිරිඳ හා දරුවන් ද ඔහු සන්තක සියල්ල ද විකුණා ණය ගෙවන්න අණ කෙළේ ය. එවිට ඒ දාසයා දණින් වැටී, ‘මා ගැන ඉවසන්න, මුළු ණය ගෙවන්නෙමි’යි කී ය. ඒ දාසයාගේ ස්වාමියා ඔහු ගැන අනුකම්පාවෙන් පිරී, ඔහු ණයෙන් නිදහස් කොට කමාව දුන්නේ ය.
එහෙත්, ඒ දාසයා නික්ම ගොස්, තම සහකාර දාසයන්ගෙන් තමාට රුපියල් දෙසීයක් පමණ ණය ව සිටි කෙනෙකු දැක, ඔහුගේ බෙල්ල මිරිකා ඔහු අල්ලාගෙන, ‘මගේ ණය ගෙවාපන්නැ’යි කී ය. එවිට ඔහුගේ සහකාර දාසයා බිම වැටී, ‘මා ගැන ඉවසන්න, ණය ගෙවන්නෙමි’යි කන්නලව් කරමින් කී ය. එහෙත්, ඔහු නොඉවසා ණය ගෙවන තෙක් ඔහු හිර අඩස්සි කෙළේ ය.
ඔහුගේ සහකාර දාසයෝ සිදුවූ දේ දැක, අතිශයින් ශෝක වී, අවුත් සිදුවූ සියල්ල තම ස්වාමියාට දැන්වූ හ. එවිට ඔහුගේ ස්වාමියා ඔහු කැඳවා කතා කොට, ‘දුෂ්ට දාසය, නුඹේ ඉල්ලීම නිසා මම ඒ ණය සියල්ල නුඹට කමා කෙළෙමි. මා නුඹට අනුකම්පා කළාක් මෙන් ම, නුඹත් නුඹේ සහකාර දාසයාට අනුකම්පා කළ යුතුව තිබුණා නොවේ දැ’යි ඇසී ය. ඔහුගේ ස්වාමියා කෝප ව ඔහු තමාට ගෙවිය යුතු සම්පූර්ණ ණය ගෙවන තෙක් ඔහු වධකයන්ට භාර දුන්නේ ය. ඔබත් එකිනෙකා තමාගේ සහෝදරයාට මුළු සිතින් කමා නොකරන්නහු නම්, ස්වර්ගයෙහි වැඩ වසන මාගේ පියාණන් වහන්සේ ද, එසේ ම ඔබටත් කමා නොකරනු ඇත.”
(ශු. මතෙව් 18:21-35)
අපි කෙනෙකුට සමාව දෙන්නේ නැත්නම්, අපේ වරදට සමාව බලාපොරොත්තු වෙන්න අපට බෑ. වරද කරන අයට සමාව දීමට වාර ගණනක සීමාවක් නෑ. ඔහු වරද හදාගනීවි යන අපේක්ෂාවෙන් අසීමිතව සමාව දීම අවශ්යයි. ඒ වගේම වරද තේරුම්ගෙන ආපිට හැරෙන තැනැත්තා ආදරයෙන් පිළිගැනීම වැදගත්.
බුදුන් ළඟ පැවිිදි වී රහත් භාවයට පත්වූ අංගුලිමාල තෙරුන්ගේ කතාවෙනුුුුත් අපට තේරුම්ගන්න පුළුවන් සත්යය ඒකයි.
නහී වේරේන වේරානී, සම්මන්තීධ කුදාචනං.
අවේරේනච සම්මන්තී, ඒස ධම්මෝ සනන්තනෝ....
(වෛරයෙන් වෛරය නොසංසිඳේ, අවෛරයෙන්ම වෛරය සංසිඳේ. මෙය සනාතන ධර්මතාවයකි.)
--------------------------------------------------
කලින් ලියූ නත්තල් කළාප
දන්න කියන කෙනෙක්
ජේසු කුහක සදාචාරවාදයට එරෙහිව
මෝසස්ගේ දෙවියන් සහ ජේසුස්ගේ දෙවියන්
බෛබලය සිංහලෙන් ඔන්ලයින් කියවන්න මෙතනින්...
.jpg)
