Saturday, October 29, 2022

මෝඩ කතා - බුරුම ජනකතා දෙකකි

ඔන්න එක කාලෙක බුරුමයේ උන්නා මෝඩ තරුණයෝ හතර දෙනෙක්. මුන් හතර දෙනා එකට මයි හිටියෙ. දවසක් බඩගින්නෙ වේළි වේළි හිටපු මේ කොල්ලො හතර දෙනා තීරණය කළා මොනව හරි කුළී වැඩක් කරල දීල කෑමට දෙයක් හොයාගන්න.

වැඩක් හොයාගෙන පාර දිගේ යන මේ කොල්ලො හතර දෙනාට මුණ ගැහුණා වයසක ආච්චි කෙනෙක්. එයා ගෙන් වැඩක් ගැන ඇහුවම එයා කිව්වා, "වත්ත පහලින් ඉළුක් කපාගෙන, මිටි බැඳගෙන ඇවිත් ‌ගොඩ ගහල දෙන්න" කියලා, පහුවදා ට වහලෙ හෙවිල්ල ගන්න.

ඉතින් මේ කොල්ලො හතර දෙනා එක සීරු වැඩ. වරුවක් යද්දි ඉළුක් කපල මිටි බැඳගෙනත් ඉවරයි. ඉතින් හතර දෙනා ඔය මිටිය ගානෙ ඔලුව උඩ තියාගෙන පේළියට ආවා ආච්චිගෙ ගෙදරට. 

ආච්චි හිටියා ඉස්තෝප්පුවෙ බංකුවක් උඩ වාඩි වලා.

පළවෙනියා ගිහිං ආච්චිගෙන් ඇහුවා, ඉළුක් මිටිය තියන්නෙ කොහෙන් ද කියලා. ආච්චි කිව්වා ගෙයි පිටිපස්සෙන් තියන්න කියලා.

ඒක අහගෙන හිටපු දෙ වෙනියත් ඇහුවා, ඉළුක් මිටිය තියන්නෙ කොහෙන් ද කියලා. ආච්චි එයාටත් කිව්වා ගෙයි පිටිපස්සෙන් තියන්න කියලා.

අර දෙන්නට ම කියපු දේවල් අහගෙන හිටිය තුං වෙනියත් ඇහුවා, ඉළුක් මිටිය තියන්නෙ කොහෙන් ද කියලා. ආච්චි එයාටත් කිව්වා ගෙයි පිටිපස්සෙන් තියන්න කියලා.

ඊට පස්සෙ හතර වෙනියත් ඇහුවා... ආච්චිට හොඳට ම කේන්තියි. "තියහං කොල්ලො ඔය ඉළුක් මිටිය ගෙයි පිටිපස්සෙන්..."

ඊට පස්සෙ හතර දෙනා ම ආපහු වත්ත පල්ලෙහට ගියා. විනාඩි දෙක තුනෙන් ආයෙත් ඉළුක් මිටිය ගානෙ ඔලුව උඩ තියාගත්ත කොල්ලො හතර දෙනා ආච්චි ළඟ.

"ආච්චි, මේ ඉළුක් මිටිය කොහෙන් ද තියන්නෙ?" පළවෙනියා ඇහුවා.

"මෝඩ යක්කු!" ආච්චි කේන්තියෙ උපරිමය ට ගිහින්. "තියාපියව් ඔය ඉලුක් මිටි මගෙ ඔලුව උඩ."

හතර දෙනා ම ඉළුක් මිටි මිට ආච්චි ගෙ ඔලුව උඩින් තිබ්බා. "බුදු අම්මෝ!" කියාගෙන, එව්වට යට වෙලා ආච්චි මළා.

ආච්චිගෙ කෑ ගැහිල්ල ඇහිලා එතනට ආපු ගම්මු, වෙලා තියෙන දේ දැකලා, අර මෝඩ කොල්ලො හතර දෙනාට හොඳට ම ගැහුවා. 

"දැන් ගිහිං ගහක් කපාගෙන වරෙව්, මිනී පෙට්ටියක් හදන්ඩ."

ඉතිං පොරවකුත් අරං කොල්ලො හතර දෙනා ගියා කැලේට. ගිහින් හොඳ ගහක් තෝර ගත්තා කපන්න.

"උඹ කපපං ගහ. මම ගහ උඩට නැගලා, ඒක වැටෙන්න ඕනෙ පැත්තට බර කරන්නං. බොලා දෙන්නා ගහ යට ඉඳපල්ලා, ගහ වැටෙනකොට ම අල්ලගෙන කරෙන් තියා ගන්න. එතකොට ගහ වැටුණට පස්සෙ උස්සලා කරෙන් තියා ගන්න ඕනෙ වෙන්නෙ නෑ." එකෙක් එහෙම කියලා, ගහට නැග්ගා. දෙවෙනියා ගහ කපන්ඩ ගත්තා. තුන් වෙනියයි, හත‌ර වෙනියයි ගහ යට සූදානමින් හිටියා ගහ අල්ල ගන්න.

ගහ සෑහෙන තරම කැපුවට පස්සෙ, එක පාරට ම ගහ වැටුණ අර ‌කොල්ලො දෙන්නගෙ ඇඟට. උන් ඒකට යට වෙලා මළා. ගහ උඩ හිටපු හාදය බිම වැටුණු කම්පණයට කලන්තෙ දැම්මා.

ගහ කපපු කොල්ලා ටික වෙලාවක් බලං හිටියා යාළුවො තුන් දෙනාට නින්ද ගිහිං කියලා. ටික වෙලාවකින් අර කලන්තෙ දාපු කොල්ල නැගිට්ටා.

ඒ විදිහට ම අනික් උන් දෙන්නත් නැගිටිනකං මෝඩයො දෙන්න හවස් වෙන තුරු බලං හිටියා. ඒත් යාළුවො දෙන්න ගහ යට නිදි. නැගිටින්නෙ ම නෑ.

ඔතනට ආව දර කපන්නෙක්. එයා මේ සිද්ධිය දැකල පුදුම උනා.

"මේ බලනවකො උන්නැහැ. අපේ මේ යාළුවො දෙන්න නැගිටින්නෙ ම නෑනෙ. පුදුම නින්දක් නෙ ගිහිං තියෙන්නෙ." අර මෝඩ කොල්ලො දෙන්න කිව්වා.

"උඹලට මද කිපිලද? පේන් නැද්ද මේ දෙන්න මැරිල කියල? අඩු ගානෙ උඹලට මිනී නරක් වෙන කුණු ගඳවත් දැනෙන් නැද්ද?" කියල දර කපන්න ඇහුව.

"ආ... ඇත්ත නේද?" කියල අර මෝඩයො දෙන්න එතනින් ගමට එන්න ආව. පාරට ආව විතරයි, එක කොල්ලෙක් ඈණුමක් ඇරිය, බඩගින්නෙ නෙ හිටියෙ...

"උඹේ කටෙන් නරක ගඳක් එනව." අනික් කොල්ලා කිව්ව. "අර පණ්ඩිතය කිව්වෙ, ගඳ ගහන්නෙ මැරිල නං කියල. උඹ මැරිල වෙන්ඩැති."

"අඩෝ! ඇත්ත නේන්නං..." කියපු අර ඈණුම ඇරපු යාළුව මහ පාර මැද්දෙ වැටුණා.

ඒ එක්කම අනිකටත් ඈණුමක් ගියා. ප්‍රතීක ක්‍රියාවක් නිසා ඈණුමක් යනව බලං ඉන්න අයටත් ඈණුමක් යනව. 

"හප්පට සිරි! මගෙ කටිනුත් නරක ගඳක් එනව. මාත් මැරිල වෙන්ඩැති" කියපු අසංග අනික් කොල්ලත් පාර මැද වැටුණ.

මේ දෙන්නා මැරිල ටික වෙලාවක් ගියා. ඔතනින් යන්න ආව ඇත් ගොව්වෙක්, ඇතාවත් එක්කගෙන. ඒත් යන්න බෑ, පාර මැද්දෙ මිනිස්සු දෙන්නෙක් නිදි.

"ඒයි... ඔතනිං අයිං වෙයල්ලා. මේක මහ පාර. මිනිස්සුන්ට යන්න එන්න ඉඩ දියල්ලා." කියල ඇත් ගොව්වා කෑ ගැහුවා.

"අපිට තේරෙනව ඒක. ඒ උනාට අපිට නැගිටල අයිං වෙන්න බෑ. අපි මැරිලා" නමියා එක කොල්ලෙක් කිව්වා.

"ආ. ඇත්තද? එහෙනං හිටපියව්" කියල ළඟට ආපු ඇත් ගොව්වා අර කොල්ලො දෙන්නට හෙණ්ඩුවෙන් ඇන්නා. ඒ පාරවල් ඉවසගෙන ඉන්ඩ බැරුව කොල්ලො දෙන්නා උඩ පැනල නැගිට්ටා.

"අඩේ! ඔය හෙණ්ඩුව මාර බලවත් නෙ. මැරිච්ච කෙනෙකුට පණ දෙන්ඩ පුළුවන් අවුසද හෙණ්ඩුවක් නෙ. ඒක අපට දෙන්නකො." කියල අර මෝඩයො දෙන්නා වද කරන්න ගත්තා.

බැරිම තැන අර ඇත්ගොව්වා හෙණ්ඩුව උන් දෙන්නට දීලා යන්න ගියා.

අවුසද හෙණ්ඩුවත් අරගෙන නමියයි නවීනුයි දෙන්නා ඉස්සරහට යද්දි, ගමේ පෝසත් මුදලාලිගෙ ගෙදර එක ම මළ ගෙයක්. මුදලාලියි හාමිනෙයි අඬනවා, විළාප දි දී. ඒ දෙන්නගෙ එක ම දුව, ගමට හිටපු හැඩකාර ම ළමිස්සි, හදිසියෙ ලෙඩක් හැදිලා මැරිලා.

අර කොල්ලො දෙන්නත් අවුසද හෙණ්ඩුව කරේ තියාගෙන ඒ ගෙදරට ගියා.

“බය වෙන්ඩ එපල්ලා. අපට පුළුවන් මැරුණු කෙනෙකුට පණ දෙන්ඩ.“ ඒ දෙන්නා කිව්වා. දුකෙන් පුං මුසපත් වෙලා හිටපු මුදලාලියි හාමිනෙයි ඒ වෙද ගැටවු දෙන්නට ඉඩ දුන්නා. උන් දෙන්නා මැරුණු කෙල්ලගෙ මිනිය කාමරේකට අරං ගිහිං, හෙණ්ඩුවෙන් ඇන්නා.

වරක් දෙකක් ඇන්නා; පණ ආවෙ නෑ. ඊට පස්සෙ තවත් දෙතුන් පාරක් ඇන්නා; ඒත් කිසි ප්‍රතිඵලයක් නෑ. පස්සෙ බැරිම තැන මුන් මිනිය ඒ මේ අත හරව හරව හැම තැනකටම හෙණ්ඩුවෙන් ඇනලා අන්තිමේ මිනිය විකෘති වෙලා ගියා.

පස්සෙ උන් දෙන්නා එළියට ඇවිත් කිව්වා වෙදකම හරි ගියෙ නැති බව. කාමරේට ගිහිං මිනිය දිහා බැලුවහම මුදලාලිට අරුං දෙන්නව පණ පිටිං කන්ඩ කේන්තියි.

“ගහපියවු මුං දෙන්නට“ මුදලාලිගෙ කටින් වචන තුන පිට වෙන්නත් කලිං මුදලාලිගෙ ගෝලයොයි නෑදෑයොයි අරුං දෙන්නට හොඳ හැටි සළකලා ඉවරයි, “පාං“ ගෑවෙන්ඩ.

“ඇයි යකෝ මෙහෙම අපරාදයක් කළේ. තොපිට අපිත් එක්ක පරණ වෛරයක්වත් තියෙනවද?“

අන්තිමේ මුදලාලි ඇහුවා.

“අනේ සමාවෙන්ඩ මහත්තයො. අපිට ඕනෙ උනේ තමුන්නාන්සෙ සතුටු කරලා කන්ඩ ටිකක් හොයාගන්ඩ විතරයි.“ අර කොල්ලො දෙන්නා වැඳ වැටිලා කිව්වා.

මුදලාලිට තේරුණා මුන් දෙන්නා උපංගෙයි මෝඩයො කියලා.

“ඉතිං යකෝ, තොපිට මෙච්චර විනාසයක් කරන්ඩ ඕනෙ යැ. තොපි දෙන්නට තිබුණෙ මිනිය ළඟට ගිහිං; ‘අයියෝ නංගී... උඹ අපිව දාල යනව නේද... අපි කොහොම ද දැන් ඉතිං මේ දුක දරා ගන්නේ...‘ කිය කියා අඬන එකනෙ“ ඔතන හිටපු එක මුත්තෙක් අරුං දෙන්නට කිව්වා.

“දැං පලයව් මගෙ දෑහැට නොපෙණී...“ මුදලාලි තර්ජනාංගුලිය ඉස්සුවා.

ඉතිං අරුං දෙන්නා ආපහු පාරට වැටුණා. ටික දුරක් යද්දි මගුල් ගෙයක් තිබුණා.

“ආාාාන්න මචං. බඩ පුරා කෑම බීම ලැබෙන තැනක්.“ එකෙක් එහෙම කියලා අනිකත් ඇදගෙන මගුල් ගෙදරට ගියා.

ගිය ගමං, මනමාලි ගාවට ගිහිං අරුං දෙන්නා කලිං අර පණ්ඩිත මුත්තා කිව්ව විදිහට ම අඬන්න පටං ගත්තා... ‘අයියෝ නංගී... උඹ අපිව දාල යනව නේද... අපි කොහොම ද දැන් ඉතිං මේ දුක දරා ගන්නේ...‘ කිය කියා.

මනමාලයටයි මනමාලිගෙ සහෝදරයන්ටයි, මලේ හොඳ ම එක... මල්වත්තක් විතර පැන්නා. ඒ උදවිය අරුං දෙන්නව එළියට අරගෙන ගිහිං බඩ කට පුරා සැළකුවා ආයෙම පාරක්.

“තොපිට පිස්සු ද යකෝ, මේ වගේ තැනකට ඇවිත් අඬන්නෙ?“ ගහල ගහල මහන්සි දැනුණහම එක්කෙනෙක් මෝඩයො දෙන්නගෙන් ඇහුවා.

“අනේ මහත්තයො, අපිට තේරෙන්නෑ. කලිං මළ ගෙදර දි පණ්ඩිත සීයෙක් කියල දුන්නෙ මෙහෙම කළොත් කන්ඩ ලැබෙනව කියල. අපිට ඕනෙ උනේ තමුන්නාන්සෙල සතුටු කරලා කෑම බීම ටිකක් හොයා ගන්ඩ“ අරුං දෙන්න කිව්වා.

“ඉතිං යකෝ! මඟුල් ගෙදරකට ඇවිත් කවුද විළාප ගහල අඬන්නෙ? තොපිට තිබුණෙ සිංදු කිය කියා නටන්ඩ නෙ. පළයව් යන්ඩ මෝඩ යක්කු!“

ඉතිං ආයෙමත් අරුන් දෙන්නා පාරට බැස්සා. ටික දුරක් යනකොට පාර අයිනෙ ගෙදරක මහ සද්දෙන් කතා බහක් ඇහෙනව. ඉතිං අරුන් දෙන්නත් ගියා ඒ ගෙදරට.

එතන ගෙදර ගෑණු මනුස්සයයි, පිරිමියයි ගජ රාමෙට වලියක්. දෙන්න ගහගන්ඩ ඔන්න මෙන්න. ඉතිං මේ මෝඩ කොල්ලො දෙන්නත් කලින් මගුල් ගෙදර කට්ටිය කියාපු විදිහට ම, අර රණ්ඩු වෙන දෙන්න වටේ සිංදු කිය කියා නටන්ඩ ගත්තා.

තප්පරයක් දෙකක් විතර මේ දෙන්න දිහා බලං හිටපු අර අඹු සැමි දෙන්නා, තමංගෙ රණ්ඩුව නවත්තලා, මුන් දෙන්නට හොඳටම තඩිබාන්ඩ පටං ගත්තා.

“අනේ මහත්තයා, නෝනා, අපිට ගහන්ඩ එපා. අපිට ඕනෙ උනේ ඔය දෙන්නා සතුටු කරලා කෑම ටිකක් ඉල්ලගන්ඩ...“ අර මෝඩ කොල්ලො දෙන්නා වැඳ වැටිලා කිව්වා.

“ඉතිං යකෝ! රණ්ඩු වෙන දෙන්නෙක් වටේ සිංදු කිය කියා නටපුහාම සතුටු වෙනවද? තොපිට තිබුණෙ අපි දෙන්නව සමාදාන කරන්ඩ මහන්සි වෙන්ඩනෙ. ‘හා හා... ඔහොම කරන්ඩ එපා. නෝනයි මහත්තයයි රණ්ඩු වෙන්න හොඳ නෑ...‘ වගේ දේවල් කියලා...“

ඒ උපදේසෙත් හොඳට හිතට ගත්ත කොල්ලො දෙන්නා ආපහු පාරට බැස්සා. පාර දිගේ ටික දුරක් යනකොට, මුන් දෙන්න දැක්කෙ මොකද්ද? කෙලිම්ම, ටූ රැටිෂ් බුල්ස් ටේකිං නේල්ස් අන්ඩර් අ ෆීවර් බුෂ් හෙවත්,  උණ පඳුරක් යට මී හරක් දෙන්නෙක් ඇණගන්නව.

මෝඩයො දෙන්නත් අර කලින් ලැබුණු උපදේසෙ හැටියට ම, රණ්ඩු වෙන දෙන්නා සමාදාන කරන්ඩ හැදුවා. “හා හා ඔහොම හොඳ නෑ. නෝනයි මහත්තයයි රණ්ඩු වෙන්න එපා...“ කියාගෙන මීහරක් දෙන්නා ඇණගන්න මැද්දට පැනපු දෙන්නා, මීහරකුන්ගෙ අං පාරවල් කාගෙන මැරිලා වැටුණා.

*    *    *

ඔය වගේ මෙලෝ අල බෝලයක් තේරෙන්නෙ නැති කොල්ලෙක් දවසක් කෑම හොයාගෙන කැලේ ගියා. එයාට හම්බුණා, උගුලක අහුවෙලා හිටපු වලි කුකුළෙක්. කොල්ලා වලිකුකුළව බේරගෙන, “අපේ ගෙදරට පලයං“ කියල අත ඇරියා. වලි කුකුළත් බොහොම හදිසියෙං ඉක්මණට ඉක්මණට දුවලා ගියා.

ඒ උනාට, කොල්ලා ගෙදර ඇවිත් බලනකොට වලි කුකුළා නෑ. ඉතිං එයා අම්මගෙන් ඇහුවා; වෙච්ච සිදුවීම විස්තර කරලා, “කෝ වලි කුකුළා?“ කියලා.

අම්මා අරූට හොඳට ම බැණලා, හති වැටුනට පස්සෙ කියල දුන්නා, “ආයෙ එහෙම ඔය වගේ දෙයක් දැක්කොත් පිහියෙන් ගහල කපාගෙන අරං වරෙන්“ කියලා.

ඊළඟ දවසෙ කොල්ලා කැලේට යද්දි දැක්කෙ වැලි හතු වගෙයක්. මූත් ඉතිං අම්ම කිව්ව වගේ පිහියෙන් ගහල කීතු කීතු කරලා අරගෙන ආවා.

එව්වා උයන්න බැරි තරම් පුංචි කෑලිවලට කැපිල තිබුණු නිසා, අම්මා කියලා දුන්නා; “ආයෙ මේ වගේ දෙයක් දැක්කොත් මුලින් ම උගුල්ලගෙන වරෙං“ කියලා.

ඊළඟ දවසෙ කොල්ලා දැක්කා ගස් බෙණේක තියෙන මී වදයක්. අනේ ඉතිං අහිංසක කොල්ලා, අම්ම කියපු විදිහට මුලින් ම උගුල්ලගන්න හිතලා, ගහට නැගලා බෙණේ ට අත දැම්මා. මී මැස්සො අර කොල්ලගෙ සරුවාංගේ එක හතර ට අනුපාතයට ඉදිමෙනකං ඇන්නා. 

තමංගෙ පුතාට වෙච්ච වින්නැහිය දැකලා අම්මට හොඳට ම දුකයි. ඉතිං වෙදකං කරලා, සනීප කරගත්තට පස්සෙ අම්මා කියලා දුන්නා; “ආයෙ එහෙම ඒ වගේ දෙයක් දැක්කොත්, ගිණි පන්දමක් හදාගෙන දුම් ගහලා ඉඳපන්...“ කියලා.

ඉතිං ඊළඟ පාර කැලේට යද්දි කොල්ලට හම්බු වුණා හාමුදුරු කෙනෙක්. අම්ම කියා දුන්න විදිහට ම කොල්ලා ගිණි පන්දමක් අවුලා ගෙන, හාමුදුරුවන්ට දුම් ගහන්න ගිහිං, සිවුරට ගිණි ඇවිළුණා.

හාමුදුරුවො ජබුක් ගාලා ඇලට වැඩම කරලා, ගින්න නිවාගෙන, අර කොල්ලගෙ පිට හරහට තදින් ම වදාරලා පන්සලට වැඩියා.

ඔය සිදුවීම අහපු අම්මා කිව්වා, “අනේ පුතේ. හාමුදුරු කෙනෙක් අඳුනගන්න පුළුවන් කහ පාට ඇඳුමෙන්. එහෙම කෙනෙක් දැක්කම මීට පස්සෙ දණ ගහල වැඳපන්“ කියලා.

ඉතිං ඊළඟ පාර කැලේ ගියාම කොල්ලට මුණ ගැහුණා කොටියෙක්. කොටියගෙ කහපාට ඉරි ඉරි හම දැක්කම කොල්ලා ඌට දණ ගහලා වැන්දා. කොටිය කොල්ලගෙ පිටට පැනලා, මරාගෙන කෑවා.

Saturday, October 22, 2022

කයිකතන්දර 3 - තොවිල් කවි

කයිකතන්දර ගැන මගේ පහුගිය ලිපිවලින් හතර දෙනෙක් එකතු වෙලා කියන කවි, භරණ ගණිතයාගේ කවි, සිංහල මවුබස නොවුණු අයගේ සිංහල කවි සහ වස් / සෙත් කවි ගැන කතා කළා. මේ වතාවේ අපි කතා කරන්නේ තොවිල් සම්බන්ධ කවි කතන්දර වගයක්.


දකුණේ ප්‍රසිද්ධ යකැදුරෙක් හිටියා. එයා නටන්නත් බොහොම සමර්ථයි, ඊටත් වඩා හොරකමට සමර්ථයි.

වතාවක කරපු හොරකමකට මේ යකැදුරාට නඩුවක් වැටුණා. උන්දැ නඩුවට ගියේ නෑ. ඉතින් වරෙන්තු නිකුත් කළා. ඒ ගමන යකැදුරා ගමෙන් පැනලා ගිහිං, උන්දැ අඳුරන "පැටියා" කියන බෙර වාදකයගෙ ගෙදර නතර වුණා.

අවුරුද්දක් විතර ගියා. ඔය අතරෙ ළඟ ගමක මහ තොවිලයක් කරන්න මේ යකැදුරාට කතා කළා. දැන් ඉතින් නඩුව ගැන වැඩි කළබලේකුත් නැති නිසා බය ඇරුණු යකැදුරා ගියා මේ තොවිලෙට.

ඔය බව දැනගත්ත, යකැදුරාගෙ ගමේ ගම්මුලාදෑනියත් ආව තොවිලෙ තියෙන ගමට. ආව නමුත්, පිට ගමක්... පිට ගමක තොවිලෙට බාධා කරන්න ගියොත් හොඳට ම කන්න ලැබෙන නිසා, ගම්මුලාදෑනියා කල්පනා කළා, හැංගිලා ඉඳලා, තොවිලෙ ඉවර වෙච්ච ගමං යකැදුරා අල්ල ගන්න.

තොවිලෙත් ගජ රාමෙට කෙරෙමින් ගියා. මැද්දෙ හරියෙදි යකැදුරා දුම්මල ගහමින් මිදුල වටේ නටන්න ගත්තා. එක දුම්මල පාරකට එළිය වැටිලා, කෙහෙල් පඳුරක් අස්සෙ හැංගිලා උන්න ගම්මුලාදෑනියවත් පැහැදිලිව පෙනුනා.

ඒ ගමන යකැදුරා කියාගෙන ආව කවිය ඉවර කරලා, මෙහෙම දෙ පදයක් කිව්වා. 

එන රඟ එන රඟ නරකයි හැටියේ

ඒකට ගුරුකම කොහොම ද පැටියේ

බෙර ගහ ගහ හිටපු පැටියට මේ කවිය හොඳට ම තේරුණා. මොකද, එයත් දැක්කා කෙහෙල් පඳුර මුල හැංගිලා හිටපු අමුත්ත.

ඒ ගමන පැටියා උත්තර දෙ පදය කිව්වා:

පිදේනි අරගෙන උන් හිටි හැටියේ

යන්න ම පල යකූ ඒ ගිය හැටියේ

යකැදුරත් නැටුම ඉවර කරලා, පිදේනි තටුවත් අරං කැලේ පැත්තට ගිහිල්ලා, එහෙම්ම ම පැනලා යන්න ගියා.

*    *    *

බලි තොවිල් කරන යකැදුරෙක් දවසක් තමන්‌ගෙ ගෝළයත් එක්කරගෙන ‌බලි යාගයකට ගියා. ඒ යන අතර මග නයාවෙල කියන තැන දි මූණ ට මූණ හම්බුනා මරක්කල වෙළෙන්දෙක්. 

යකැදුරා වෙළෙන්දගෙන් ණයට ගත්තු පොඩි ගනුදෙනුවක් තිබුණා. මරක්කල වෙළෙන්දා ඒක මතක් කළා. යකැදුරා ගාව සල්ලි තිබුණෙ නෑ. 

"හෙට දෙන්නං මුදලාලි" යකැදුරා කිව්වා.

"යේක අරියන්නේ ගුරුන්නාන්සෙ. ඇමදාම එට එට කිය කියා මගාරිනවා." කියපු වෙළෙන්දා යකැදුරාගෙ තට්ට ඔලු ගෙඩියට ඇන්නා පොල් ටොක්කක්. යකැදුරාට "බුදු අම්මෝ" කියවුණා.

මරක්කල මනුස්සයා යන්ඩ ගියාට පස්සෙ යකැදුරා ඔලුවත් අත ගගා, ගෝලයට කිව්වා,

"උඹ මේ ගැන කාටවත් එහෙම කියන්ඩෙපා ඈ..." කියලා.

ගෝලයත් එකඟ වුණා.

"හැබැයි ගුරුන්නාන්සෙ, තොවිලෙට ගිහිං දිග කවි කියන්ඩෙපා ඈ. මට දිග කවි එකක්වත් මතක නෑ." ගෝලයගෙ කොන්දේසිය.

යකැදුරත් එකඟ වුණා.

ඔන්න ඉතිං අදාළ ගෙදරට ගිහිං, බලි අඹලා, තොවිලෙ පටන් ගත්තා.

යකැදුරා කවි කිය කියා නට නටා ගිහිං, දන්න සේර ම කොට කවි කියලා ඉවර වුණා. ඒ ගැම්මට ම යකැදුරා පටන් ගත්තා දිග කවියක් කියන්න.

සාව කුළේ ඉපිද අපේ - බෝසත් සසොබන - ඇඟ මස් දුන්නේ

තොවිල්වලදි, ගුරා කියන පදේ අනික් පදේ ගෝලය කියන්ඩෝනෙ. ඉතිං, තමන්ට වෙච්ච පොරොන්දුව මතක කරපු ගුරුන්නාන්සෙ ගැන මල පැනපු ගෝලය අනික් පදේ කිව්වා; 

னයා වෙලේ මරක්කලේ - ඇන්න කලේ ටොකූ - මරහඬ දුන්නේ

කියල.

*    *    *

යකැදුරෝ කීප දෙනෙක් ගියා එක තොවිලෙකට. තොවිලෙ කරන්න කලින් ඒ උදවියට ජයට ම කෑ ලෑස්ති කරල තිබුණා; තම්පලා හොද්ද, හා මස් එක්ක බත්.

යකැදුරෝ ටික බඩ දිගෑරෙන්ඩ කාලා, යාගෙ පටන් ගත්තා. රෑ දොගොඩහරි ජාමෙ විතර වෙද්දි, ගෙදර උදවිය එකා එකා වැටුණු වැටුණු තැන්වල නිදි.

ඒක දැකපු එක තක්කඩියෙක් කට්ටඬියෙක්ට මතක් වුණා ගෙදර වත්තෙ සරුවට වැවුණු අල කොටුවක්. උන්දැ කිව්ව සලයා කියන යකැදුරාට ඇහෙන්ඩ යාග කවියක්:

සලයෝ සලයෝ මුන් නිදි සලයෝ

පලයෝ පලයෝ අල හාරා පලයෝ

පලයෝ පලයෝ බබයත් එක්ක ම පලයෝ

අල හාරන දොස බලියට පලයෝ

ඒක ඇහුණු බඩ ජාරි යකැදුරෙක් කුස්සිය පැත්තට යන ගමං තව කවියක් කිව්වා:

දණ්ඩේ දණ්ඩේ තම්පල දණ්ඩේ

කන්ඩේ කන්ඩේ ඉඳගෙන හා මාලු කන්ඩේ

යන්ඩේ යන්ඩේ අරගෙන ගමට දුවන්ඩේ

හා මාලු කෑ දොස මේ බලියට යන්ඩේ


Tuesday, October 18, 2022

යුරෝ සංචාරය

ස්කොට් තෝමස් හෙවත් ස්කොටී, හයිස්කූල් හෙවත් උසස් විදුහලෙන් එළියට එන කොල්ලෙක්. ඔහු මොන අවස්ථාවක, මොන විදිහෙ දෙයක් කරයි ද කියලා වේලාසන කාටත් හිතාගන්න පුළුවන් විදිහෙ, අහිංසක සාමාන්‍ය කොල්ලෙක්.

ඒක ඔහුගෙ පෙම්වතිය ෆියෝනාට ගැළපෙන්නෙ නෑ. ඔවුන් ගේ උපාධි ප්‍රදානෝත්සව දිනයේ දී ඇය ඔහුගෙන් වෙන් වන බව ඔහුට කියනවා. ඇය කියන්නේ, තවදුරටත් වංචා කරමින් ප්‍රේම කරන්නට නොහැකි බව.

එදා උත්සවයේ දී ෆියෝනාගේ අනික් පෙම්වතා රොක් ගීතයක් ගයනවා. ඔහු එය පුද කරන්නේ ෆියෝනාට. ගීතයෙන් කියවෙනවා, "...ස්කොටී දන්නෙ නෑ. ෆියෝනාත් මාත් හැම සති අන්තයක ම හමු වී ජිඟිරි බිරිස් (මෙයට යෙදිය යුතු, චිත්‍රපටයට ගැළපෙන වචනය මෙතනට යොදා ගන්න හිතෙන්නෙ නෑ.) කරනවා..." ආදී විස්තර වගයක්.

හදවත බිඳුණු, උපහාසයට සහ නිග්‍රහයට ලක් වුණු ස්කොටී ඔහුගේ හොඳ ම යාළුවා කූපර් හැරිස් එක්ක එදා හවස කතා කරමින් ඉද්දි කියනවා, ඔහුගේ දුරස්ථ ජර්මන් මිතුරෙක් ගැන. ඔවුන් හමුවන්නේ අන්තර්ජාලයේ චැට් මඟින්. ජර්මන් මිතුරා ගේ නම මයික් (Mieke) ලෙසින් ස්කොටී උච්ඡාරණය කරගන්නේ. 

එතන දී කූපර් කියනවා, ගොඩක් ම යුරෝපීය පිරිමින් සමලිංගිකයන් බව. තව දිගට චැට් කරගෙන යද්දි, මයික් කියාවි "මම ඔබ හමුවෙන්න එන්නම්, " කියලා. ආන්න එතනදි පරිස්සම් වෙන්න ‌වෙනවා.

එදා රෑ ස්කොටී, මයික් එක්ක චැට් කරද්දී ඔහු සහ ෆියෝනා අතර සිදු වුණු දේ කියනවා. එතන දී ඔහුගේ දුක ගැන සංවේදී වන මයික් කියනවා, "මට ඔයා ගැන දුකයි. මම ඔයා හමුවෙන්න එන්නම්..." කියලා.

කූපර් ගේ අනතුරු ඇඟවීම මතක තිබුණු ස්කොටී මයික් ට බැණ වැදී, "ආපහු ඔබ එක්ක සබඳතා තියාගන්න කැමති නැති" බව කියමින් චැට් එක අවසන් කරනවා.

ස්කොටී ගේ මල්ලි ඔහුට පහුවදා උදේ පැහැදිළි කරනවා, ජර්මන් නම් උච්ඡාරණය කරන නිවැරදි විදිහ. ඔහුට අනුව, ස්කොටී චැට් කර තියෙන්නේ මයික් සමඟ නොවේ මීකා නම් සුරූපී කෙල්ලක් සමඟ.

නමුත් ස්කොටී ප්‍රමාද වැඩියි. මීකා ඔහු සමඟ චැට් කිරීම නතර කරලා. 

ඉතින් ස්කොටී ත් කූපර් ත් ඇමරිකාවේ ඉඳන් ජර්මනියට යන්න පිටත් වෙනවා, මීකා හමු වෙන්න. ඔවුන්ගේ තවත් මිතුරන් දෙන්නෙක් වන ජෙනී සහ ජේමී නම් නිවුන්නුත් ඔවුන් සමඟ මේ ගමන යනවා. ඒක සෘජු ගමනක් නෙවෙයි. එංගලන්තය, ප්‍රංශය, නෙදර්ලන්තය, ස්ලොවැකියාව හරහා ඔවුන් ජර්මනියට එනවා.

ඒ අතර යුරෝ සංචාර ගැන විශේෂඥ දැනුමක් ඇති ජේමී ළඟ ඇති ඔවුන්ගේ මුදල් සහ ටිකට් පත් නෙදර්ලන්තයේ දී සොරකම් කෙරෙනවා.

සංචාරකයෙකුට ලැබිය හැති හැම නරක අත්දැකීමක් ම ලබන මේ සිවු දෙනා ස්ලොවැකියාවට එද්දී අතේ ඉතිරි වන්නේ සත කිහිපයක් පමණයි.

ජර්මනියට ආ පසු ඔවුන් ට මීකා හමු වන්නේ නැහැ. ඇය සිත් තැවුලෙන් වතිකානුවට පිටත් වී ගිය බව ඇගේ පියා දන්වනවා.

ඇය සොයාගෙන වතිකානුවට යන ස්කොටී සහ මිතුරන් ට ඇය හමු වන්නට කලින් තවත් අනපේක්ෂිත හාස්‍යජනක සිදුවීම් ගණනාවකට මුහුණ දෙන්නට සිදු වෙනවා.

මේ කියා ඇත්තේ මිහිරි පළතුරු ගෙඩියක ලෙල්ල වැනි පිටස්තර නීරස විස්තර ටිකක්. හැබෑ රසය ගැන පොඩි හෝඩුවාවක් ට්‍රේලරයෙන් බලා ගන්නට පුළුවන්.


යුරෝ ට්‍රිප් 2004 දී එළි දැක්වුණු හාස්‍ය රසයෙන් පිරුණු ලිංගිකත්වයත් ස්පර්ෂ කරන තරුණ චිත්‍රපටයක්. රසවිඳින්න ටොරන්ට් එක මෙතනින්

Friday, October 14, 2022

ඔසිමැන්දියස්

(ෂෙලී නමැති ඉංග්‍රීසි කවියාගේ කවි සංකල්පනාවක් විකාසනය කිරීමෙන් සැකසිණ)

රජුන් හට ද රජකම් කළ අසම සම

ඔසිමැන්දියස් වෙමි මම ලොව පතළ නම

සුරුකම් මගෙ බලව් තෙපි දුබලයිනි හැම

යන මේ වදන් විය අඩිතාලමෙහි එම

(ඔසිමැන්දියස් - ෂෙලී).

සියුම් වැල්ලෙන් සැදීගත් වැලිතලය පෙනෙන තෙක් මානයේ පැතිරී තිබිණ.

නිල් අහස් කුසෙහි තැනින් තැන පා වෙන, සුදු හංසයන් වැනි වලා පටල අතරින් පෙරී එන ළහිරු රැසින් වැලිතලය නෑවෙයි.

විටින් විට සුළං පහර සැඬ වෙයි. එවිට වැලි රැලි නැඟී විසිරී පැතිරෙයි.

මුළු පරිසරය ම නිහඬ බවක ගිලී සිටී.

සැරයටියක් අතින් ද, හිස් වැස්මක් හිසින් ද ගත් දේශාටකයා, කිසිදු බියක් සැකක් පැකිළීමක් නැති ව ඉදිරියට ම ගමන් කරයි. තිර අදිටනක් හා බලාපොරොත්තුවක් ඔහු තුළ ඇති බව ඔහුගේ බැල්ම කියා පායි.

කෙමෙන් දැඩි වන හිරු රැස්, දේශාටකයාගේ දිරිය බිඳලන්නට සමත් නොවූයේය.

දේශාටකයා තිර අදිටනින් ගමන් කරන්නේ, වරක් සිය විකුම් පැරකුම් බලයෙන්, තද තෙදින්, ලොව කැළඹූ, සතුරු හද වෙවුල් වූ මහා අධිරාජයෙකු වෙනුවෙන් නැංවුණු විශාල පිළිරුව නැරඹීමේ අදහසිනි.

එකල මේ අධිරාජයාගේ කිතු ගොස ලොව කම්පා කරමින් පැතිරී ගියේය.

ඔහුගේ තෙද ගින්නෙන්, සතුරු හදවත් තැවී දැවී ගියේය.

ඔහුගේ සැහැසිකම්, කුරිරු ගති පැවතුම් නිසා, සතුරන් පමණක් නොව, මිතුරෝ ද, නිබඳ වෙවුලුම් ගත් හදවත් ඇති ව කල් ගෙවූහ.

රාජ සභාවේ කවියා විසින්, සුලලිත පද මාලාවෙන් විසිතුරු කොට බඳනා ලද ප්‍රශස්ති කාව්‍ය, වන්දිභට්ටයන් විසින් ගායනා කරනු ලැබිණ.

සුර ළඳුන් සදිසි පුරවමියෝ, අධිරාජයාගේ රන් සුහසුන දෙපස සිට හිම ගිරි ගඟුලැල්ලේ පැහැය ගත් සෙමෙර වල් විදුනාවෙන් ඔහුට පවන් සැලූහ.

දේශාටකයා අධිරාජයාගේ දැවැන්ත පිළිරුව ඉදිරියට පැමිණියේය.

විසිතුරු වේදිකාවක් මත ඉදි කරනු ලැබූ දැවැන්ත පිළිරුව නැරඹීමට ඔහු ඇස් නැගීය.

දැවැන්ත පිළිරුව බඳින් කැඩී ගොස් තිබිණ. ඉතිරි වී ඇත්තේ බඳින් පහළ කොටස පමණකි. පිළිරුවේ යෝධ පා යුවළ දුටු දේශාටකයා ගේ හදේ සැල්මක් ඇතිවිණ.

පිළිරුවේ හිස වැලිතලය මත වැටී තිබිණ. දේශාටකයා විමසුම් ඇසින් පිළිරුව දෙස බැලුවේය.

වේදිකාවේ කොටන ලද අකුරු පෙළක් ඔහුගේ නෙත් ඇද ගත්තේය.

"මම වෙමි මුළු ලොව දිනු ජගතා"

දේශාටකයා මුහුණ බිමට හරවා ගෙන සිතිවිල්ලෙන් පසු වෙයි. ඔහු මඳ වේලාවක් දෙනෙත පියා ගෙන, සුළං පහරට කන් දීගෙන සිටියි. සුළඟ සමග මුසු වූ ගීත රාවයක් ඔහුට ඇසෙයි.

මම වෙමි මුුළු ලොව දිනු ජගතා

මම වෙමි රුපු දප බිඳි සමතා


තෙද බල ඇති සතුරන් එඩි බින්දා

ලොව හැම තැනකම දිය දද බන්දා

රුපු සිරසෙහි පා නිය රැස් රන්දා

මම වෙමි මුළු ලොව දිනු නරනින්දා

ඔහු දෙනෙත විදහා දෙපස බලයි.

සුළඟ සාවඥ ලෙස සිනාසුණේය. එහි දෝංකාරය මුළු ‌වැලිකතර වසාගෙන පැතිරී ගියේය.

සුළං රැලි නැගෙමින්, වැලි රැලි පැතිරෙන්නට විය. පිළිරුවේ හිස වැල්ලට යට වී ඇත.

කාලය ගෙවී ගොස්ය.

දේශාටකයා නැව් තොට බලා ගමන් කරයි.

ගමන් මග දිගය.

අහසේ හිරු මැකෙයි.

සැඳෑ අඳුර පැතිරෙයි.

අහසේ තරු නැගෙයි.

එදා රජිඳුගේ තෙදින් සැලුණු තරු අද සාවඥ ලෙස සිනාසෙති'යි දේශාටකයා ට සිතිණි.

පර්සි බිෂේ ෂෙලී

7 වන ප්‍රමාණයේ මවුබස කියවීම් පොතක ඇතුළත් පාඩමකින්...

මෙය ගැන සඳහනක් නිදහස් සිතුවිලි බ්ලොගයේ රවි සහ රසික විසින් සටහන් කර තිබුණි.

Monday, October 10, 2022

කයිකතන්දර - 2 කොටස - වස් / සෙත් කවි

බොරලැස්ගමුවේ ජී. එච්. පෙරේරා ගේ කයි කතන්දර පොතෙන් තවත් කවි ටිකක් අරගෙන ආවා. මගෙ කලින් ලිපියෙන්, දෙමළ මවුබස කරගත් මරක්කල සහ දෙමළ උදවියගෙ සැහැල්ලු කවි ටිකක් පළ කළා. ඒවා ගැන හිනාවුණාට, සිංහල මවුබස කරගත්ත උදවියගෙ කවි ඇහුවහම ඊට හතයි. මේ පහළින් තියෙන්නෙ ඒ වගේ කවි කීපයක්.


අන්දිරිසා තරුණ වෙළෙන්දෙක්. උන්නැහැ මනමාලියක් කැන්දං ආවට පස්සෙ මාස කීපයක් වෙළෙඳාමට යන්නෙ නැතුව ගෙදර හිටියා. එයාගෙ අම්මට ඒ ගැන හරි කේන්තියි. අලුත් ලේලි ආවට පස්සෙ තමංගෙ පුතා ඇඹලයා වගේ ගෙට ම වෙලා ඉන්න එක ගැන.

ඉතිං අම්මගෙ වදේටයි, මාස කීපයක් වැඩක් නැතුව සිටීමෙන් අහේනියට පත් වුණු නිසායි, අන්දිරිසා ගියා උඩරට උඩිස්පත්තුව කියන පළාතට, වෙළෙඳාමට. ඒ අතරෙ අලුත් ලේලි ට අලුත් විකල්පයක් හම්බවුණා. එයා ආවෙ හරංකහපිටියෙ ඉඳලා. තමංගෙ පුතා ඇඹලයා කරගත්ත එක ගැන හිතේ කහට තියාගෙන හිටිය අම්මත්, මේ සම්බන්ධෙට පොඩි තල්ලුවක් දුන්නා.

ඉතින් අන්තිමේ මාස දෙක තුනකින් අන්දිරිසා ගෙදර එනකොට, භාර්යාව නෑ. අසල්වැසියන්ගෙනුත් සමහර තොරතුරු මේ ගැන එයාට දැනගන්න ලැබුණා. හොඳට ම කේන්ති ගිය අන්දිරිසා, කොළයක් අරගෙන මේ කවිය ලියලා ඇඳේ වියනෙ එල්ලුවා...

උඩිස්පත්තුවේ මම වෙළෙඳාමෙ ගියා

ගෙදර ඇවිත් බැලු කොට මගෙ ගෑණි නැහෑ

අපෙ අම්මත් මේකට උපකාර කළා

හරංකහපිටිය දුටුවොත් මරඤ්ඤා

*    *    *

අබංචියා කියා තරුණයෙක් හිටියා. හොඳ ට ඇහැට කණට පේන, කඩවසම් කොල්ලෙක්. (නම ලස්සන නැති උනාට). ගමේ ගෑණු ළමයි සෑහෙන්න මෙයා ගැන හිතේ තියාගෙන උන්නා. ඒ අතරින් අබංචියාගේ හිත ගත්තේ, දොච්චො හාමි ගෙ දුව ඉසබෙලා. එයා අනික් ගෑණු ළමයිට වඩා ලස්සනයි. ඉතින් අබංචියත් ඒ ගෙදර නිතර යන එනව.

ඔය සම්බන්දෙ ගමේ අනික් උන්ගෙ ඊර්ෂ්‍යාවට හේතුවක් උනා. කඩපිලේ, නාන ළඳේ, බණ මඩුවෙ... ඔය වගේ පොදු තැන් වල මේ ගැන කට කතා පැතිරුණා.

ලැජ්ජ බය හැදුණු නමියා අබංචියා මේවට කැමති නෑ. ඌ කාටත් නොකියා ගමෙන් පිටවෙලා යන්න ගියා.

ඒකෙන් හොඳට ම දුක් වුණේ ඉසබෙලා. එයා පුළුවන් තරම් ආරංචි හොයලා බැලුවා, අබංචියා ගැන. අංජනං බැලුවා, වෙලාවල් බැලුවා, ඒ කිසිම දෙයක් හරි ගියෙ නෑ.

අන්තිමේ තමන් දන්න විදිහට සෙත් කවියක් ලියලා, දවස් හතක් ගොම්මං වෙලාවට පාන පත්තු කරලා, සෙත් කවිය කිව්වා.

මෙන්න මෙහෙමයි ඒ සෙත් කවිය...

උඹයි මායි මෙහෙම ඉන්න කොට

වටින් පිටින් ඉන්න සෙනඟට

අනුංගේ කීමකට

අබංචියෝ හඳ පානේ වර ගමට

කවි කියන්න පටන් ගෙන අට වෙනි දවසෙ අබංචියා ගමට ආවා.

*    *    *

මිහිරිපැන්නේ ධම්මරතන හාමුදුරුවෝ ප්‍රසිද්ධ කවිකාර උන්නාන්සෙ කෙනෙක්. එතුමාගෙ පන්සලට නිතර ආ ගිය කෙනෙක් තමා, දුම්බර විදානෙ කියන විහිළු නමින් හැඳින්වුණු මෝඩ පහේ තරුණයා. එයා ගෙන් හාමුදුරුවන්ට බේරුමක් තිබුණෙ නෑ, සෙත් කවියක් හදල දෙන්න කියලා. නිතරම වද කළා. 

දවසක් හාමුදුරුවො තල් පතක් අරගෙන මේ කවිය ලියලා දුන්නා උන්දැට... 

බැකිසි බකුසාණේ

කරවැල් මහ කොකාණේ

දිය ගැරඬියාණේ

රකිව් දුම්බර මහ විදානේ

*    *    *

ලීයක් කපන්ඩ හරි, අලෙයක් හාරන්ඩ හරි, ඔය මොකක් හරි වැඩකට කැලේට ගිය මනුස්සයෙකුට බෝ පැලයක් දකින්න ලැබුණා. සැබෑ බෞද්ධයෙක් විදිහට ප්‍රීතියෙන් පිනා ගහිං උන්දැ, එතන එළි පෙහෙලි කරලා, වටේ වැටක් එහෙම ගහලා ගෙදර ගියා. පස්සෙ පස්සෙ දවස් කීපයකට සැරයක් එතනට ඇවිත්, බෝ පැලේ ට වතුර දාන්නයි පෝර දාන්නයි ගත්තා. කාලයක් යද්දි බෝ පැලේ සරුවට වැවුණා. පස්සෙ පස්සෙ අර මනුස්සයා දවස ගානෙ උදේ හවස ඒකට මල් පහන් පූජා කරන්නත් පටං ගත්තා. තමංගෙ ජීවිතේටත් වඩා එයා බෝ පැලේට ආදරේ කළා.

දවසක් පාන්දර ගිහින් බලනකොට, අලියෙක් කලින්දා රෑ ඇවිත් බෝ ගහේ අතු කඩලා, කොළ කාලා, පොත්තත් හූරගෙන කාලා, බෙටිත් දාලා ගිහිං තිබුණා.

එවෙලේ අර මනුස්සයට අලිය අහුවුණානං නැට්ට පිටිං ගිලින්න තරම් කේන්තියක් ආවා. එහෙමම ආපහු හැරිලා ගෙදර ආපු උන්දැ, මෙන්න මේ කවිය ලියා ගෙන ගිහිං බෝ පැලේ දණ්ඩෙ එල්ලුවා.

ගුවන පිරීලා අරණේ වැඩ ඉන්නේ

අරණ හැම තැනම ගුවනින් පිරීලා

මෙතෙක් කලක් මම සැපසේ ඇති කෙරුවා

ඇයි සිරිමා හාමුදුරුවනේ,

දලුත් නැතුව - කොළත් නැතුව - අතුත් නැතුව - පොතුත් නැතුව - ලෙලිත් නැතුව - මුලුත් නැතුව - අලියත් නොමර - නිකම්ම නියවා ගෙන වැඩ ඉන්නේ

(මේක සවුදම් ශෛලිය වෙන්ඩැති?)

*    *    *

මැයි නෝනා තමන්ගෙ මනුස්සයට ආදරේ ඇති ස්ත්‍රියක්. එයාගෙ මහත්තෙය ජේමිස් සිංඤෝ. ඒ දෙන්නට පුතෙකුත් ඉන්නව. පුතාට අවුරුදු පහක් තරම වෙනකල් දෙන්නා දෙමාල්ලෝ රන් රස සේ එකට හිටියා. ඔය අතරෙ අහල පහල ගෙදරක හොර මායියෙක් ජේමිස් සිංඤොට සෙට් වුණා.

දැන් ඉතින් ජේමිස් සිංඤො ගෙදර එන්නෙ ඉඳ හිටලා. ඒ ආව වෙලාවලත් මැයි නෝනත් එක්ක රණ්ඩුවක් අල්ලනව.

ඉතින් මැයි නෝනා ගොඩක් දේවල් කරමින් උත්සාහ කළා, තමුංගෙ මනුස්සයව යහ මඟට ගන්ඩ. නෑදෑ වැඩිහිටියො ලවා අවවාදත් දුන්නා. ඒවයින් වුණේ ගුටි බැට තව ටිකක් වැඩි වෙන එක.

අන්තිමේ මැයි නෝනා කවියක් හදලා, තමන්ගෙ පුතාට පාඩම් කෙරෙව්වා. හොඳටම පාඩම් වුණාට පස්සෙ, ළමයට කිව්වා තාත්ත ගෙදරට ආවම මේ කවිය කියන්ඩ කියලා.

ඉතින් ඊළඟ දවසෙ ජේමිස් සිංඤො ගෙදර ආව වෙලාවෙ පුතා අර කවිය කිව්වා. එතනිම්ම ජේමිස් සිංඤොගෙ දුශ් චරිතය නතර වුණා. කාට හරි ප්‍රයෝජනයක් වෙතොත් කියලා පහතින් තියෙනව, ඒ කවිය.

ජේමිස් සිංඤෝ මගෙ මිතුරේ අහපන්න

මැයි නෝනව කණවැන්දුම් නොකරන්න

කන්න අඳින්නත් හරි හැටි දීපන්න

ඇයි තාත්තෙ මැයි නෝනව අත් ඇරියේ




Thursday, October 6, 2022

පුංචි මෆිට් මෙනවිය, පැන්ස හයේ සිංදුව සහ වී විලී වින්කී - ළමා කවිවල අඳුරු ඉතිහාසය

ආයෙම පාරක් අපි හොඳින් ම දන්නා ළමා කවි කීපයක ඉතිහාස කතාව හොයාගෙන ආවා. 

පළමුවෙන් ම, පුංචි මෆිට් ගෑණු ළමයා.

මෙන්න කවිය:

පුංචි මෆිට් මෙනවිය

උස් තණ ගොඩැල්ලක (සමහර අය කියන විදිහට කකුල් තුනේ බංකුවක) වාඩි වුණා

ඇගේ මුදවපු කිරි සහ මෝරු කමින්

මකුළුවෙක් ඇවිල්ලා

ඇගේ පසෙකින් වාඩි වෙලා

පුංචි මෆිට් මෙනෙවිය බයකරලා එළෙව්වා

මේ කවියෙන් කියවෙන්නේ දොස්තර තෝමස් මෆිට් (1553 - 1604) සහ ඔහුගේ දුව (සමහරු කියන විදිහට සුළු දියණිය) වන පේෂන්ස් මෆිට් ගැන.

දොස්තර මෆිට් ගේ කාලයේ මිනිස්සු විශ්වාස කළා, සෙම්ප්‍රතිෂ්‍යාව වගේ ‌සමහර රෝග සුව කරන්න මකුළුවන්ට පුළුවන් කියලා. සමහරු මකුළුවෙක් ඇතුල් කළ බීජ ඇටයක් තමන්ගේ ඇඳුමේ පළඳගෙන සිටීම කළ අතර, තවත් සමහරු මකුළුවන් බටර්වලින් ආවරණය කර ගිල්ලා.

දොස්තර මෆිට් තමන්ගේ දුව අසනීප වුණු විට ඒ විදිහෙ ප්‍රතිකාර කරලා, ඒ විශ්වාසය ගැන පර්යේෂණ කරන්න ඇති කියලා විශ්වාස කරනවා. 

පැන්ස හයේ සිංදුව

මේ කවිය ඇත්තට ම සංඥා භාෂාවකින් ලියපු මුහුදු කොල්ලකාරයන්ගේ පණිවුඩයක්. මෙන්න කවිය:

පැන්ස හයේ සිංදුවක් ගයන්න
රායි පිරුණු මල්ලක්,
හතරකුත් විස්සක් කළු කුරුල්ලන්
පයි එකකට දාලා පිළිස්සුවා
පයි එක විවර කළාම,
කුරුල්ලො ගායනා කරන්න පටන් ගත්තා;
ඒක රසවත් දීසියක් නෙවෙයිද
රජෙක් ට ඉදිරිපත් කරන්න?

රජු හිටියා විසිත්ත කාමරේ,
ඔහුගේ සල්ලි ගනිමින්;
රැජිණ හිටියා කුස්සියේ,
පාන් සහ පැනි කමින්;
සේවිකාව හිටියා අංගනයේ,
රෙදි වනමින්;
පුංචි කළු කුරුල්ලෙක් ඇවිත්
කෙටුවා ඇගේ නහයට.



මේ කවිය සුප්‍රකට කපිතන් කළු රැවුළා හෙවත් කැප්ටන් බ්ලැක් බියර්ඩ් නම් මුහුදු කොල්ලකාරයා, තමන්ගෙ නැවට නැවියන් බඳවා ගන්නට ප්‍රසිද්ධ කරපු පණිවුඩයක්. මුහුදු කොල්ලකාරයෙකුගේ සතියක වැටුප වුණේ, පැන්ස හයක් සහ රායිවලින් පෙරන ලද විස්කි කුලාවක්. කළු කුරුල්ලන් කිව්වේ කළු රැවුළාගේ නැවියන්ට. පයි එක ලෙසින් හැඳින්වුණේ ඔවුන්ගේ නැව.

කළු රැවුළාගේ සාමාන්‍ය ඉළක්කය බවට පත් වුණේ රාජකීය නාවුක හමුදාවේ නැව්. ඒ අනුව, කළු කුරුල්ලන් පිරුණු පයි එකක්, රජු ඉදිරියට පමුණුවන්න බොහොම අගනා "දීසියක්" හැටියට පෙනෙන්න පුළුවන්.

පරණ ඉංග්‍රීසි කියමනක් තමයි, "හැම ආකාරයකම පුදුමයන් පයි එකක් තුළින්...". ඒක කපිතන් කළු රැවුළා ගොඩක් වෙලාවට යොදාගත්ත උපක්‍රමයක්. ඔහුගේ නැවක්, විපතට පත්වුණු, එහෙමත් නැත්නම් කුණාටුවකට අසුවී අතරමං වුණු නැවක් විදිහට පෙනෙන්නට ඉඩ හරින එක. ඒ ළඟින් යන වෙළෙඳ නැවු හෝ වෙනත් මුහුදු කොල්ලකාර නැවු, ඒ නැවට පිහිට වෙන්නට හෝ ඒ නැවේ ඇති දේ කොල්ල කන්න ආ විට, ඒවාට පහර දී අල්ලා ගැනීම තමයි ඒ උපක්‍රමය.

"රජු හිටියා විසිත්ත කාමරයේ - සල්ලි ගනිමින්" යන පදයෙන් කියවෙන්නේ කපිතන් කළු රැවුළා සතුව මුදල් ඇති බව. "රැජිණ" යන්නෙන් අදහස් කළේ ඔහුගේ "ඈන් රැජිණගේ පළිගැනීම" (Queen Anne's Revenge) නම් නැව. එය වරායක නැංගුරම් ලා තිබීම සහ ආහාර පාන ආදිය පටවා ගැනීම, රැජිණ පාන් සහ පැනි කෑමෙන් හැඟවෙනවා.

අංගනය කියා හැඳින්වුණේ කැරොලයිනා සිට කැරිබියන් දක්වා මුහුද. මෙහෙකාරිය ලෙස අදහස් කෙරුණේ ඉළක්කගත නැව තිබූ තැන. රෙදි වනමින් සිටීම මඟින්, එම නැව් රුවල් ඔසවා යාත්‍රා කරමින් හෝ යාත්‍රා කිරීමට සූදානමින් ඇති බව හැඟවුණා.

තවත් සමහරෙක් කියන විදිහට, මේ කවිය අටවන හෙන්රි රජු, පූජකාශ්‍රම තහනම් කිරීම සමඟ සම්බන්ධ වෙනවා. කලින් ලිපියේ ජැක් හෝනර් ගේ කවියේ කතාවම...

ඒ අනුව, පුංචි කළු කුරුල්ලන් මගින්, අට වන හෙන්රි රජු වෙත නත්තල් පයි එකක් හැදූ පූජකාශ්‍රමවල පූජකයන් හැඳින්වුණා. පයි එක ඇතුළට මන්දිරවල ඔප්පු ඇතුළත් කිරීම, පුංචි කළු කුරුල්ලන් පයි එකෙන් මතු වීම සංකේතවත් කෙරුණා.

තවත් සමහරුන් කියන්නේ, අර එළදෙන හඳට උඩින් පැනීම කවියේ සඳහන් ඉතිහාසයට මේ කවියත් සම්බන්ධ බව. වැඩිමනත් ම දෙවෙනි කොටස. එහි, රජු අට වන හෙන්රි වූ අතර, රැජිණ යනු ඇරගොන් හි කැතරින් රැජිණයි. මෙහෙකාරිය, රජු පසුව විවාහ කර ගත් ඈන් බෝලීන් වුණු අතර, ඇගේ නහයට කෙටීමෙන්, ඇය පසුව හිස ගසා දැමුණු වග සංකේතවත් කරනවා.

තවත් සමහරුන් ගේ අදහස, කළු කුරුල්ලන් විසි හතරෙන් පැය විසි හතරත්, රජු සහ රැජිණ පිළිවෙලින් ඉර හා හඳත්, සංකේතවත් කරන බව.

වී විලී වින්කී

ළමයින් රෑ අට වෙනකොට ඇඳට යවන්න අතීතයේ දෙමාපියන් හදාගත්ත සංකල්පයක් තමයි මේ වී විලී වින්කී. ඔහු මුල් කාලයේ දී නපුරු අවතාරයක්. මේ තියෙන්නෙ ඊට සම්බන්ධ කවිය.


වී විලී වින්කී
නගරය පුරා දුවනවා
උඩ තට්ටුයි යට තට්ටුයි පුරා
ඔහුගේ රෑ අඳුම පිටින්
ජනෙල්වලට ගහමින්
අගුල් තුලින් කෑ ගහමින්
"ළමයි ඔක්කොම ඇඳට ගිහින් ද?
දැන් වෙලාව අටයි"

දෙමාපියන්, ළමයින් නිදි කරවන්නට යොදාගත්ත සංකල්පයක් වුණත්, මේ කවියේ ඉතිහාස කතාවක් තියෙන බව එක තැනක කියවන්න ලැබුණා. ඒ විල්හෙල්ම් වින්ක්ලර් නම් පුද්ගලයා ගැන.

ඔහු ගේ රාජකාරිය වෙලා තියෙන්නේ, රාත්‍රියේ නගරය පුරා සැරි සරමින්, ළමයින් ඇල්ලීම. මේ; අනාථ ළමයින් හෝ ගෙවල්වලින් පැනලා ගිහින් වීදියේ නිදාගත්ත ළමයින්. මේ ළමයින් අල්ලාගෙන ඔහු අනාථ නිවාසවලට හෝ වර්ක් හවුස් නම් ආයතනවලට සැපයීම කළා. ඒ වෙනුවට ඔහුට යම්කිසි මුදලක් ලැබුණා.



සමකාලීනව සහ පසුකාලීනව ඔහු ගැන කියමින් ළමයින් බය කර ඇඳට යවන්නට දෙමාපියන් පුරුදු වුණු බව හිතන්නට පුළුවන්. 

මේ කතාව තහවුරු වෙන ඉතිහාස සාධක සොයාගන්න ලැබුණේ නම් නැහැ.

මූලාශ්‍ර

https://middlestown.accordmat.org/wp-content/uploads/sites/4/2020/04/The-Truth-About-Little-Miss-Muffet_-Text.pdf

https://www.theguardian.com/notesandqueries/query/0,5753,-26667,00.html#:~:text='Sing%20a%20Song%20of%20Sixpence,the%20'pie'%20his%20ship.

https://interestingliterature.com/2018/10/a-short-analysis-of-the-sing-a-song-of-sixpence-nursery-rhyme-origins-history/

https://www.snopes.com/fact-check/pirates-sing-song-sixpence/

https://www.straightdope.com/21343044/what-s-the-nursery-rhyme-sing-a-song-of-sixpence-all-about

https://medium.com/linguist/sing-a-song-of-sixpence-9beff05cf2f0

https://www.worldanvil.com/w/wfrp-fragile-alliances-didz/a/wee-willy-winky-article?preview=true?

Sunday, October 2, 2022

පිටස්තරයාගේ වාර්තාව 3 - විශ්වාස


මගේ පහුගිය වාර්තාවක සඳහන් වුණු හැටියට මේ ග්‍රහලෝකයේ ඉන්නා බුද්ධිමත් ජීවීන්ගේ චර්යාවන් එකිනෙක සියුම් ව පරීක්ෂා කර වාර්තා කරන්නැයි උපදෙස් ලැබී තිබුණි. ඒ අනුව, මේ වාර්තාවෙන් මේ කියන බුද්ධිමත් ජීවීන් ගේ විශ්වාස ගැන වාර්තා කරමි.

මේ ජීවීන් විශ්වාස කරන බොහෝ දේ තිබෙන අතර, ඒවා හැම එකක් ම වාගේ ඇත්තට ම නොපවතින, එහෙමත් නැත්නම් පවතින බව තහවුරු කරගන්නට බැරි කාරණා වේ. ඒ වගේ ම ඒවා කීපයක් එකට පටළැවී, එකට ක්‍රියාත්මක වෙන දේවල් ය.

එයින් ලොකු ම එක වන්නේ, අයිතිවාසිකම් ය. මේ ජීවීන් විශ්වාස කරන්නේ, හැම ජීවියෙකුට ම මේ ග්‍රහලෝකය මත ජීවත් වෙන්නට අයිතියක් තියෙනවා කියා ය. එහෙම උනත්, බුද්ධිමත් ජීවීහු උන්ගේ උවමනා එපාකම් අනුව අනික් ජීවීන් උපද්දවීම, පවත්වාගෙන යාම සහ මරා දැමීම කරති. ඒ වගේ ම නීති සහ ආගම් නමින් හඳුන්වන විශ්වාසයක් මගින් ඒ චර්යාවන් පාලනය කරන්නේ නැති නම්, බුද්ධිමත් ජීවීහු ම තම තමන් ම මරා දැමීම කරති. 

මේ විශ්වාසයේ තවත් පැත්තක් වන්නේ, හැම බුද්ධිමත් ජීවියෙකුට ම මේ ග්‍රහලෝකය මත තියෙන දේවල් සමානව අයිති බව ය.

අයිතිවාසිකම් කියන විශ්වාසයේ භාවිතය මේ කාරණාවේ දී වැදගත් වේ. මේ විශ්වාසය භාවිත කරන්නේ පාලකයන් කියනා කොටස ය. අනික් බුද්ධිමත් ජීවීන් සමූහයක්, දහස් ගණනකටත් වඩා වැඩි පිරිසක් එකමුතු , තමන් ගේ නායකත්වය යටතේ එක ඉළක්කයක් කරා මෙහෙයවන්නට පාලකයන්ට මේ විශ්වාසය උපයෝගී වේ. ජීවීන්ගේ අයිතිවාසිකම් රැක ගන්නට සහ දියුණු කරන්නට ඇති උවමනාවක් පෙන්වමින් පාලකයන් බවට තමන් පත් කරවීමට මේ නායකයෝ අනික් ජීවීන් මෙහෙයවති.

එහෙම පත්වන නායකයන්, අනික් බුද්ධිමත් ජීවීන්ගේ අයිතිවාසිකම් ගැන කතා කරන නමුත්, වඩා උනන්දු වන්නේ පාලකයන් හැටියට තමන්ගේ සැප පහසුව සහ පරිභෝජනය මනාව පවත්වාගෙන යාම ගැන ය.

ඒ වගේ ම මෙතනට සම්බන්ධ වෙන තවත් විශ්වාසයක් වන්නේ සීමා ය.

මේ ග්‍රහලෝකයේ බුද්ධිමත් ජීවීන් වාසය කරන්නේ ගොඩබිම ප්‍රදේශවල පමණි. ඒ ගොඩබිම ප්‍රදේශ බුද්ධිමත් ජීවීන් විසින් රටවල් යැයි මායිම් නියම කරගෙන වෙන් කර ඇත. ඒ රටවල් පාලනය කරන්නට රාජ්‍ය කියා ජාතියක් ඇති අතර, ඒ රාජ්‍යවල ඉන්නා බුද්ධිමත් ජීවීන් කාලෙන් කාලෙට තම තමන් දරණ විශ්වාස අනුව තම තමන්ගේ නායකයන් පත් කර ගනිති.

ඒ වගේ ම අසල්වැසි රටවල් සමග විටින් විට යුද්ධ කියා ජාතියක් කරති. එතන දී අර මුලින් සඳහන් කරන ලද අයිතිවාසිකම් ගැන කිසිදු තැකීමක් නොකර, එකිනෙකා මරා ගනිති. ඒ විදිහට මරා ගන්නට පවා බුද්ධිමත් ජීවීන් පොළඹවන්නට අර කියන ලද විශ්වාසයන් ඉවහල් වේ. ව්‍යාප්තවාදය, බෙදුම්වාදය, ජාතිකත්වය, වාගේ විශ්වාසයන් මෙසේ කණ්ඩායම් මෙහෙයවීමට භාවිත වෙන අතර, මේවාත් අර මුලින් කී අයිතිවාසිකම් නම් විශ්වාසයේ ම අතුරු කොටස් වේ. 

ජන වර්ග කියා විශ්වාසයක් ද පවතින අතර, එය මුල් කරගෙන අර ඉහත කී ජාතිකත්වය, ව්‍යාප්තවාදය හා බෙදුම්වාදය කියනා විශ්වාසයන් ක්‍රියාත්මක වෙයි. මේ ජන වර්ග කියන්නේ, බුද්ධිමත් ජීවීන් විවිධ කොටස්වලට බෙදනා ක්‍රමයකි. හැම බුද්ධිමත් ජීවියෙක් ම උපතින් ම එකිනෙකාට සමාන වන අතර, ඔවුන්ගේ වැඩිහිටියන් විසින් ඉහත කී විශ්වාසයන් අනුව තම තමන් වර්ගවලට බෙදා ගනිති. 

මේ කියන වර්ග බෙදෙන්නේ තර්කානුකූල ලක්ෂණ අනුවය. ඔවුන් කතා කරන භාෂාවල ඇති වෙනස්කම්, ආගම් කියනා විශ්වාසයන්ගේ වෙනස්කම්, සිරිත් හා පුරුදුවල වෙනස්කම් ආදී ලක්ෂණ අනුව ඔවුහු තම තමන් වර්ග වලට බෙදා ගනිති. බොහෝ විට මෙසේ බෙදීමට යොදාගැනෙන්නේ ඉතා ‌සුළු විශ්වාසයන් ය. උදාහරණයක් ලෙස, සමහරෙක් සත්ත්ව මළ සිරුරු ආහාරයට ගන්නේ, එම මළ සිරුරුවල ලේ ඉවත් කිරීමෙන් පසුව වන අතර, තවත් සමහර ජන වර්ගයන් සත්ත්ව මළ සිරුරු ආහාරයට ගන්නේ ම නැත. 

එහෙම වුණත්, ජන වර්ගයක සියලුම සාමාජිකයන් මේ හැම සිරිතක් ම පුරුද්දක් ම අනුගමනය නොකරති. හැම ජන වර්ගයකම වාගේ, ඊට අදාළ රීති හා සිරිත් අනුගමනය නොකරන සාමාජිකයන් දැකිය හැකි වේ.

ධනවාදය, සමාජවාදය වගේ විශ්වාසයන් ද රාජ්‍යයන් පාලනය කරද්දී භාවිත වෙන නමුත්, ඇත්තට ම ප්‍රායෝගිකව සිද්ධ වෙන්නේ පාලකයන් තමන්ගේ පැවැත්ම ස්ථාවර කර ගැනීම විතරකි. තමන් මෙහෙයවන කණ්ඩායමේ පැවැත්ම හෝ අර මුලින් කියන ලද අයිතිවාසිකම් ගැන තැකීමක් පාලකයන් හට නැත.

ආගම සහ නීතිය කියා විශ්වාසයන් වර්ග දෙකක් ද ඇත. මගේ පහුගිය වාර්තාවේ කියූ අර කාකි ඇඳුම් අඳින රක්ෂා කරන්නෝ මෙයින් නීතිය කියනා විශ්වාසය පවත්වාගෙන යන උදවිය ය. කහ, තැඹිලි හෝ ගුරු පාට නැත්නම් සුදුපාට නිල ඇඳුම් අඳින රක්ෂා කරන උදවිය ආගම් කියනා විශ්වාසය අනික් ජීවීන් අතරේ පවත්වාගෙන යති. මේ දෙකෙන් ම අර ඉහත කී පාලනය කරන ජීවීන් ගේ කාර්යය පහසු කරවන්නේ ය.

ආගම සහ නීතිය කියන්නේ බුද්ධිමත් ජීවීන් සෙසු බුද්ධිමත් ජීවීන් අතරේ හැසිරිය යුතු ආකාරය ගැන ය. ඒත් ඒ ආකාරයට පාලනය කරන උදවිය හැසිරෙන්නේ නැත. ඔවුන්ට තම තමන්ට උවමනා හැටියට හැසිරීමට හැකි අතර, ඒක ප්‍රශ්න කරනවා වෙනුවට බොහොමයක් බුද්ධිමත් ජීවීන් කරන්නේ ඒ හැසිරීම් සාධාරණීකරණය කිරීමය. පාලකයන් හට පාලනය කිරීමට පහසුවන ආකාරයට බුද්ධිමත් ජීවීන් හසුරවීම සහ හික්මවීම නීති මඟින් සිදු වේ. ඒ වාගේ ම පාලකයන්ට එරෙහිව නැගී සිටින බුද්ධිමත් ජීවීන් මෙල්ල කිරීම සහ මර්ධනය කිරීම ද එහි තවත් කාර්යයකි.

ආගම්වලින් මීට අමතරව බුද්ධිමත් ජීවීන්ට එළඹෙන හිරිහැර සහ දුක්ඛිත ජීවිත ගැන ඔවුන්ගේ හිත හැදීම සහ ඉවසීම ඇති කරවා දී පාලනයට එරෙහිව ඔවුන් නැගී සිටීම අධෛර්යවත් කරමින්, පාලකයන් ගේ කටයුතු පහසු කර දීම ඉටු කරයි.

ඇත්ත කියා විශ්වාසයක් ද මේ ජීවීන් අතර ඇත. ඔවුන් එය තදින් විශ්වාස කරන අතර, එම ඇත්ත ඔවුන්ට ලැබෙන්නේ බෝහෝ විට වෙනත් කෙනෙක් ලබා දෙන තොරතුරක් හැටියට ය. මාධ්‍ය කියා දෙයක් ඇත. එය කඩදාසි මත අච්චු ගහන ලද්දක් හෝ විද්‍යුත් සන්නිවේදන ක්‍රමයකින් හෝ තොරතුරු ලබා දෙන ක්‍රමයකි. මේ මාධ්‍ය තමන් දෙන තොරතුර තමන්ගේ විශ්වාසයේ හෝ අරමුණේ හැටියට සකස් කර ලබා දුන්නත්, බුද්ධිමත් ජීවීන් විශ්වාස කරන්නේ ඒ තොරතුරු ඇත්ත කියා ය.

මේ හැටියට බලන කොට මේ බුද්ධිමත් ජීවීන් ජීවත් වෙන්නේ විශ්වාස ගොඩක් අනුව හැඩ ගස්සවන ලද ජීවිතයකි. ඉපදීම, පරිභෝජනය, පැවතීම, බෝ කිරීම සහ මිය යාම කියනා කාරණාවලින් ඔබ්බට ගියපු යම් කිසි තේරුමක් මේ ජීවිතයට ඇතැයි කියා ද ඔවුහු විශ්වාස කරති. ඉතා ම බහුතරයක් මේ විශ්වාසවලින් ම මෙහෙයවෙන අතර, ඉතා ම සුළුතරයක් මේ විදිහට ජීවීන් තුල තියෙන විශ්වාසවල වාසිය රැගෙන තමන්ගේ ජීවිත සැප පහසු කරගනිති.


පසුගිය වාර්තා.

වාර්තා අංක 01 - ජීවීන්

වාර්තා අංක 02 - රැකී රක්ෂා

වැඩිපුර බලපු ලිපි