එදා අප දුටු චිත්‍රපටයකින් - අවසාන ක්‍රියාදාම වීරයා (Last Action Hero)

වැන්දඹු මවක් ගෙ එක ම පුතා ජේමි. ඔවුන් දුප්පත්. කොයිතරම් දුප්පත් ද කියතොත් ගෙට පැනපු හොරාත්, ජේමි ට බැණලා හිස් අතින් ම යන්ඩ යනව. 

ජේමි ට ඉන්න එක ම යාළුවා සිඩ්, බංකොලොත් මහළු සිනමා ශාලා කරුවෙක්. ඔහුටත් ඉන්න එකම පාරිභෝගිකයා  ජේමි විතරයි. ජේමි ගෙ හිතේ තාත්තා ගැන තියෙන හැඟීම ට පණ දෙන්නෙ, දැනටමත් චිත්‍රපට තුනකින් ම සාර්ථකව නිරූපණය කෙරුණු ජැක් ස්ලේටර් නම් ප්‍රබන්ධගත පොලිස් රහස් පරීක්ෂකයා.

ජැක් ස්ලේටර් හතර වන කොටස පළමුවරට තිරගත කරන්නට පෙර, එහි පිටපතක් ජේමිගේ යාළුවාට ලැබෙනවා. එය ඔහු උත්සවාකාරයෙන් ජේමි වෙනුවෙන් තිරගත කරනවා. එතනදී, ඔහු ජේමිට දෙනවා රන්වන් ටිකට් එකක්. එය ඔහුට දිලා තිබෙන්නේ සුප්‍රකට මැජික් ශිල්පී හැරී හුඩීනී.

ඒ ටිකට්පතේ බලයෙන් ජේමී චිත්‍රපටය ඇතුළට යනවා. මෙන්න මෙහෙම...

ආාා... කියන්න අමතක වුණා. ජැක් ‌ස්ලේටර් චරිතය කරන්නෙ ආනෝල්ඩ් ෂ්වෝට්සෙනෙගර්.

ෆැන්ටසි කතාවක් වුණත්, මේකෙ මාර යථාර්ථවාදයක් නිරූපණය කරනවා. ෆිල්ම්වලදි පෙන්නන බොරු, ඒ කියන්නෙ, දුෂ්ඨයා අවසානයෙදි පරදිනවා, වීරයා හැම විට ම දිනනවා. කොයිතරම් අමාරු වුණත්, වීරයා ට මහන්සි දැනෙන්නෙ නෑ, ෆිල්ම්වල හැම තැන ම ඉන්නෙ සුරූපී නිළියො... වගේ දේවල තියෙන ඇත්ත මේකෙ එළිපිට කතා කරනවා.

ජේමි ඇතුළට ගිය විදිහට ම එළියට එන දුෂ්ඨයා, සැබෑ ලෝකයේ දි දුෂ්ටයින්ට වරදින්නේ නැති බව දැකලා පුදුම වෙනවා. ජැක් ස්ලේටර් 3 චිත්‍රපටියේ දුෂ්ටයා ත් එළියට අරගන්න ඔහු ඇත්ත ජීවිතයෙදි ආනෝල්ඩ් ෂ්වෝට්සෙනෙගර් මරන්න තැත් කරනවා. ඒ ජැක් ස්ලේටර් 4 චිත්‍රපටය මංගල දැක්මෙ දි. එතනට ආනෝල්ඩ් ගෙ මිතුරු සුප්‍රකට නලුවො කිහිප දෙනෙක් ම පෙනී හිටිනවා, ආනෝල්ඩ් ගෙ බිරිඳත් සමඟින්.

මම චිත්‍රපටවල දැකපු එක විහිළු දෙයක් තමයි, නළුවෙක් සාර්ථක වෙනකොට, ඔහු ධනවතෙක් වෙනකොට, ඔහු වෙනුවෙන් ම චිත්‍රපට හැදෙනවා, ඔහු නිෂ්පාදනය හෝ අධ්‍යක්ෂණය කරමින්... ශාරුක් ඛාන් ගෙ රාවන්, හෝව් ශාන්ති හෝව්, ඒ වගේ චිත්‍රපට. 

ඒ විදිහට ම ලාස්ට් ඇක්ෂන් හීරෝත්, හදන්නෙ ආනෝල්ඩ් අර මං ඉහත කියපු අවධියට ආවට පස්සෙ. නමුත් ‌මේකෙ තියෙන විශේෂත්වය වෙන්නෙ, ආනෝල්ඩ්ව කොයිතරම් උත්කර්ෂයට නැඟුවත්, ඒ සියල්ලේ ම තියෙන හිස් බව මේකෙ නිරූපණය කරන එක.

ඉතින්, ජේමි ජැක් ස්ලේටර් එක්ක දුෂ්ටයා අල්ලන්නෙ කොහොමද? දුෂ්ටයාගෙන් ජේමි බේරෙන්නෙ කොහොමද? ජැක් ස්ලේටර් ට ආනෝල්ඩ් ගෙ ජීවිතය බේරන්න පුළුවන් වුණා ද? ඔය වගේ ප්‍රශ්න ගණනාවකට පිළිතුරු මෙන්න මෙතනින් බාගත කරගන්න මේ චිත්‍රපටිය බැලීමෙන් හොයාගන්න පුළුවන්.

අවසානයට... අපි කලින් කියවපු, හැම්ලට් කතාවේ මෙන්න මේ කොටසත් බලන්න... මේ පැරඩි කොටස තියෙන්නෙ ලාස්ට් ඇක්ෂන් හිරෝ චිත්‍රපටියෙ ම තමයි.