ඇත්ත බොරු

ඔමේගා යනු ඇමරිකානු ආණ්ඩුවේ රහස් ඔත්තු සංවිධානයක්. ඒකේ සිටින දක්ෂ ම සහ කැපවීමෙන් කටයුතු කරන නියෝජිතයෙක් හැරී ටස්කර්. ඔහු ඕනෑම අවස්ථාවකට මුහුණ දිය හැකි, ක්ෂණික තීරණ මත ක්‍රියා කරන තැනැත්තෙක්. වරක් ඔහු තමන්ට පහර දෙන්නට ඇවිත් මෝටර් බයික් එකක් පැහැරගෙන පළා යන ත්‍රස්තවාදියෙකු පස්සෙන් ළුහුබඳින්නේ පොලිස් අශ්වයෙකු පිටින්. ත්‍රස්තවාදියා බයික් එක හෝටලයකට ඇතුල් කරගෙන, ලිෆ්ට් එකට නඟිනවිට, හැරීත් තමන්ගේ අශ්වයා පිට සිටිමින් ම අනිත් ලිෆ්ට් එකට නඟිනවා.

ආණ්ඩුවේ රහස් තමන්ගේ පවුලේ උදවිය සමඟවත් බෙදා ගත නොහැකියි. ඉතින්... හෙලන් ටස්කර් හෙවත්, හැරී ගේ බිරිඳ දන්නෙත් හැරී යම්කිසි පරිගණක අලෙවි සමාගමක නියෝජිතයෙක් බවයි. 

හැරී ගේ රාජකාරි දවසක් සාමාන්‍යයෙන් අනතුරුදායක සහ වික්‍රමාන්විත ක්‍රියාවන්ගෙන් බහුලයි. ඒ අවස්ථාවන්ට හැරී මුහුණ දෙන්නෙත් ඉතාම සාමාන්‍ය සහ එදිනෙදා හුරුපුරුදු දේවලට මුහුණ දෙන්නා වාගේ.

හැරී ගේ බිරිඳ හෙලන් පුරුද්දට වාගේ ඔහුගෙන් අහනවා, අද දවස මොන විදිහට ද ගත වුණේ කියලා. ඔහු ඉතා ම සාමාන්‍ය විදිහට ඊට උත්තර දෙනවා. ඔහුට කියන්නට බැහැ ඇත්ත සිදුවීම ගැන. ඉතින් ඔහු කියන බොරු විස්තර හෙලන් ට ඉතා ම නීරසයි. ඇය කැමතියි යම් කිසි වික්‍රමාන්විත සිදුවීම් ගැන අහන්න, කතා කරන්න, නැත්නම් තමන්ගේ ජීවිතයට යම් කිසි ත්‍රාසයක් එකතු කරගන්න.

ඔවුන් දෙදෙනාගේ දුව, ගැටවර වයසේ. සාමාන්‍ය පවුලක දරුවෙක් වාගේ ම ඇයත් දෙමාපියන්ගෙන් දුරස්තරයි. තාත්තා ගේ රාජකාරි සහ ජීවිත රටාව ඇයට අල්ලන්නේ නෑ.

ඔය අතරේ තමයි හෙලන් ට හමු වෙන්නේ සයිමන්. ඔහු හෙලන් ට පෙන්වන්නේ, රාජ්‍ය රහස් ඔත්තු සේවාවක නියෝජිතයෙක් හැටියට. 

ඒ සම්බන්ධය ගැන දැනගන්නා හැරී ටස්කර් මොකද කරන්නෙ? ඒ අතරෙ ඔහු පිටුපසින් පන්නන ක්‍රිම්සන් ජිහාඩ් ත්‍රස්තවාදියන් එක්ක ඔහු ගනුදෙනු කරලා බේරාගන්නේ කොහොමද?

බලන්න චිත්‍රපටිය... (ටොරන්ට් එක)

ටයිටැනික් සහ ටර්මිනේටර් 2 ෆිල්ම් හදපු ජේම්ස් කැමරන් ගේ ඒ කාලෙට ම අයත් නිර්මාණයක්‌ මේක. ටර්මිනේටර් 2 ෆිල්ම් එකට පස්සෙ සහ ටයිටැනික් ට කලින් වැඩිම වියදමක් දරා නිපදවපු, ඒ වගේ ම ආදායම් වාර්තා තබපු ෆිල්ම් එකක්. බලල නැත්නම් බැලුවට පාඩුවක් නෑ.

අවසාන ෆයිට් එක තමයි හොඳ ම. හැරී ටස්කර් ගෙ දුව පැහැර ගන්නා ත්‍රස්තවාදීන් එක්ක සටන් කරන්නට හැරී යන්නේ මැරීන් හමුදාවේ මිග් ප්‍රහාරක යානයකින්.

අඃ... තව ඩිංගෙන් අමතක වෙනවා. ඉතා ම ලස්සන ටැංගෝ ඩාන්ස් දෙකක් ඇතුළත් මේ චිත්‍රපටියට.

තවත් වරක් අමතක උනා කියන්ඩ... හැරියගෙ බොස් හැටියට රඟපාන්නෙ මං දේවත්වයෙන් වගේ සළකන, එල් සිඩ් ෆිල්ම් එකේ සිඩ්... චාල්ටන් හෙස්ටන්.