යක්කුං‌ගෙ නිධානය - බුරුම ජනකතාවක්

ඉතිං ඔන්න කාලෙකින් බ්ලොග් එකට ආව. පහුගිය ටිකේ ඩ්‍රැකියානි විභාගයකට පාඩම් කළා. මම ඔය විභාගෙට පාඩම් කළේ 2017දි. ඒ දවස්වල මම හැම ඉරිදම පන්ති ගියා. හැමදාම රෑ 9 විතර ඉඳන් 12 විතර ‌වෙනකං පාඩම් කළා. ඒ කාලෙ අපේ පුංචිරාළට අවුරුදු ‌දෙකයි වයස. ඉතිං මට ඒ පාඩම් වැඩවලට පහසු ‌වෙන බබා බලාගෙන, ‌ගෙදර ‌දොරේ මා අතින් ‌වෙන්න තිබුණු ‌දේවලුත් සම්පූර්ණ කරගෙන, ඩ්‍රැකියානි මට මාර උපස්තම්භයක් වුණා. විභාගෙන් පස්සෙත් අපේ පත්වීම් අවුරුද්දක් හමාරක් පරක්කු වුණා. ඒ ගැන මම වැඩි විස්තර කවද හරි ලියාවි. ඒ කාලෙ විභාගෙ පාස් වුණු අපි ‌‌සෙට් එකම ‌ලොකු මහන්සියක් ගත්තා කටයුතු ටික ආපහු හරි මාර්ගෙට ගන්න. ඒකාලෙත් ඩ්‍රැකියානි මට මාර විදිහට සහයෝගය දුන්නා හිත නිරවුල්ව ඒ කටයුතු ටික කරගන්න. ඉතින් මමත් මට ඒ මට්ටමින්ම කරගන්න බැරි උනත්, මට ඇහැකි විදිහකට එයාට බැකප් එකක් දුන්නා ‌මේ පාර. ඒ නිසා බ්ලොග් එක ‌පොඩ්ඩක් පාලුවට ගියා.

ඉතිං අද මම කියන්න යන්නෙ බුරුම ජනකතාවක්. ගංජ කාරයෙකුයි, ‌බේබද්දෙකුයි, යක්කුයි ගැන.

https://www.vectorstock.com/royalty-free-vector/devil-tattoo-smoking-red-vector-27403285

බුරුමෙ එක්තරා හන්දියක තිබුණු අම්බලමක්, යක්කු රැස්වෙන තැනක් කියල ප්‍රසිද්ධ ‌වෙලා තිබුණා. කවුරුවත් ඒකෙ රෑ නවාතැන් ගත්තෙ නෑ යක්කුන්ට බයේ.

ඒ ගමේ හිටියා ගංජවලට ඇබ්බැහිවුණු මනුස්සයෙක්. එයා ගමෙන්ම ‌කොන් ‌වෙලා හිටියෙ, ඒ ඇබ්බැහිය නිසා. උන්දැට යාලුවෙකුට හිටියෙ තවත් ඒ වගේම රා‌ ‌බොන්ඩ ‌පෙරේත මනුස්සයෙක් විතරයි. ‌මේ ‌දෙන්නා උදේ ඉඳල ‌කොහෙ හරි කුළී වැඩක් කරලා කීයක් හරි ‌හොයාගෙන, හවස් අතේ තම තමන්ගෙ ඇබ්බැහිය සංසිඳුවාගෙන, කා‌ගෙ හරි අගු පිළක නිදා ගන්නව.

දවසක් ඔය ගංජ ‌ලෝලියට ‌කොහෙවත් කුළී වැඩක් හම්බුණේ නෑ. එයා හවස් ‌වෙනකොට ‌බොහොම අපේක්ෂා භංගත්වයට පත්වෙලා, කඩමණ්ඩියෙ ඉඳං, එතනට යන එන අය‌ෙගෙන් සල්ලි ඉල්ලන්න පටං ගත්තා.

ඔතනින් ගියපු ඉස්කෝලෙ මහත්තයෙක් ‌හොඳ ‌යෝජනාවක් කළා අර ගංජ බුවාට.

"තමුසෙ පුළුවන්නං අර අම්බලමෙ එක රැයක් ඉන්නව. මම තමුසෙට රුපියල් සීයක් ‌දෙනව" (ඔය කියන්නෙ අපේ සීයලගෙ කාලෙ)

කොල්ලා එක පයිං කැමති වුණා. "ඒකත් වැඩක්ද මහත්තෙයා. මම යන්නං දැන්ම. හැබැයි මට රුපියල් පහළොවක් ‌දෙන්ඩ දැං. ‌බනිස් ‌ගෙඩියක් කාලා, ‌ජොයින්ට් එකක් හදාගන්ඩ.."

ඉස්කෝලෙ මහත්තෙයා දුන්නා රුපියල් විස්සක්.

ඉතිං අර ‌කොල්ලා, එදා රෑ අම්බලමට ගියා පැදුරකුත් අරං. ගිහිං ඒකෙ ‌කොට බිත්තියක් උඩ ඉඳගත්තා. හීනියට ගංජ සුරුට්ටුවකුත් හදාගෙන පත්තු කරගත්තා. රෑ ‌දොළහට කිට්ටු ‌වෙද්දි අරූට නින්ද ගියෙම නෑ බයට. ඔන්න එතකොටම යක්කු එකා ‌දෙන්නා ‌‌සේන්දු ‌වෙන්න ගත්තා අම්බලමට. ආපු පළවෙනි යකා අරූ ‌දිහා ‌හොඳට බැලුවා.

"ආ.. ‌කොහොමද?" ගංජ කාරය ඇහුවා. "මං ටිකක් ‌වේලාසන ආව." කටේ ගිනි පුපුරකුත් තිබුණු නිසා ඉතිං යකා ඌ ගැන සැක කළේ නෑ.

පැය කාලක් විතර යද්දි යක්කු බර ගාණක් අම්බලමට ඇවිත්.

"මනුස්ස ගඳයි..." එකෙක් කිව්ව. "අපි ගණං කරල බලමු..."

"‌කෝ බලන්ඩ" ගංජ කාරය ඉස්සරහට ඇවිත්... "මං ගණං කරන්නං. ඔන්න මායි, එකයි, ‌දෙකයි, තුනයි..." එහෙම ගණං කරල, එකෙක් වැඩිපුර නෑ කියල ඔප්පු කළා.

ඉතිං ආපහු යක්කු ටික කතා බහ පටං ගත්තා.

"‌මේන්න ‌මෙතන නිධානෙයක් තියෙනව." එක යකෙක් අම්බලම ගාව ගහක් යටට අත දික්කරල ‌පෙන්නුව. ගංජ කාරය ‌හොඳට තැන මතක තියාගත්තා.

ඉතිං මුලු රෑම ආගිය කතා කතා කරපු යක්කු ටික පාන්දර ‌වෙද්දි යන්ඩ ගියා.

ගමේ උදවිය ආව ඉස්කෝලෙ මහත්තෙයත් ඉස්සර කරගෙන අර ගංජ කාරයට ‌මොකද වුණේ කියල බලන්න. සමහරු උදලු, ගල්කටුත් අරගෙන ආවෙ අරූ යකා ගහල, මැරිල නං වළලන්ඩ හිතාගෙන. ඒ ආව ‌කෙනෙක්ගෙන් උදැල්ලක් ඉල්ලගත්ත ගංජ කාරයා, ඒ අය ගියාට පස්සෙ අර නිධානෙ ‌ගොඩදාගෙන ‌යාළු බේබද්දත් එක්ක ‌ගෙයක් ‌දොරක් හදාගෙන ‌බොහොම ‌හොඳින් ගමේ වාසය කරන්ඩ පටං ගත්තා.

බේබද්දටත් කාලයක් යද්දි ආස හිතුණා නිධානයක් ‌හාරගන්ඩ. ගංජ කාරයා ‌කොච්චර එපා කිව්වත් අහන්නැතුව එයත් දවසක් ගියා අර අම්බලමට. ගිහිං ‌හොඳටම බීලා ‌කොට බිත්තිය උඩ ඇල වුණා. ‌උන්දැට නින්ද ගියා. යක්කු ටික ඇවිත් කලින් දවසෙ වගේම "මනුස්ස ගඳයි " කියලා ‌හොයන්න ගත්තා. එතකොට දැක්කා බුදියගෙන ඉන්න ‌බේබද්දව. කලින් දවසෙ නිධානෙ ගන්ඩත් ඇත්තෙ මූ ම තමයි කියල හිතපු යක්කු ටික, උන්දැගෙ නහය දහ අට රියන් ‌දික් වෙන්න ඇදලා, ගියා.

පහුවදා උදේ යාළුව ‌හොයාගෙන ගංජ කාරයා අම්බලමට යනකොටත් උන්දැ නිදි.

ඉතිං ‌බොහොම අමාරුවෙන් එයාව ‌ගෙදර එක්කරගෙන ගියපු ගංජ කාරයා හිතාගත්තා, අර දිග නහය ‌කොට කරන්ඩ විදිහකුත් යක්කුන්ගෙන්ම තමයි අහගන්න ‌වෙන්නෙ කියල.

ඉතිං තවත් පාරක් ගංජ කාරයා ගියා අම්බලමට. එදත් යක්කු ටික රැස් ‌වෙලා මිනිස් ගඳට ‌හොයන්න ගත්තා. ඇහැරලා හිටපු ගංජ කාරයා යක්කු ටික රවට්ටගෙන තමනුත් යකෙක් විදිහට රඟපෑවා.

"එදා උඹලා ටික අරූ වටකරගත්තනෙ. මට ළඟටවත් යන්ඩ බැරිවුණා." ගංජ කාරයා කිව්වා. "මම උන්නෙ අරූගෙ නහය දහඅට රියන් ‌නෙවෙයි, අසූ රියන්වත් ‌වෙන්න අදින්න." ඉතිං යක්කු උන්දැ ගැන සැක කළේ නෑ.

"හැබෑට ‌කොහොමද ඔය නහය ‌කොට කරන්නෙ?" ගංජ කාරයා ‌ෂේප් එකේ ඇහුවා.

"සිම්පල්නෙ මල්ලි" එක යකෙක් කිව්වා. "අමාවක දවසක රෑ, කලුවර ‌මෝල්ගහක් ඔය නහයට කිට්ටු කළාම, එක පාරකට අඩිය ගානෙ ‌කොට ‌වෙනව."

ගංජ කාරය ‌හොඳට මතක තියාගත්ත ‌වෙදකම.

එදත් පාන්දර ‌වෙනකං කතා බහ කර කර හිටපු යක්කු ටික කුකුළ අඬලද්දි යන්ඩ ගියා. ගංජ කාරයා ‌ගෙදර ගිහිං අර කියපු ‌වෙදකම කරලා යාලුව ‌බේරගත්තා.

මේ කතාවෙ ආදර්ශය ‌මොකද්ද? කියවපු උදවිය පහළිං කමෙන්ට් කරගෙන යන්ඩ...